QR Aqparat jáne qoǵamdyq damý ministri Aida Balaevanyń tóraǵalyǵymen «Mereili otbasy» Ulttyq baiqaýyn daiyndaý jáne ótkizý jónindegi jumysty úilestirý, uiymdastyrý komitetiniń otyrysy ótti, dep habarlaidy "Ult aqparat".
Uiymdastyrý komitetiniń quramyna Parlament Senatynyń depýtaty, QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiia músheleri, óńir ákimderiniń orynbasarlary, ministrlik, BAQ-nyń ókilderi, ÚEU-dar, belgili qoǵam qairatkerleri kirdi.
Óz sózinde ministr A.Balaeva adamgershilik qundylyqtardy jańǵyrtýǵa jáne otbasy mártebesin arttyrýǵa baǵyttalǵan ulttyq konkýrstyń ereksheligi men mańyzdylyǵyn atap ótti.
«Jyldaǵy dástúrmen biyl da «Mereili otbasy» ulttyq konkýrsyn bastaǵaly otyrmyz. Elbasynyń usynysymen qolǵa alǵan joba – búginde naǵyz halyqtyq merekege ainaldy. Jyl saiyn bul jobaǵa halyqtyń úlken qyzyǵýshylyqpen qatysyp júrgenin kórip otyrmyz. Joba bastalǵannan beri búginge deiin elimizdiń 15 myńnan astam januiasy osy baiqaýǵa qatysty. Munyń ózi – bizdiń qoǵamǵa otbasy qundylyǵyn dáripteitin, úlgi kórsetetin erekshe jobaǵa ainalǵanyn kórsetedi dep bilemin», - dedi A.Balaeva.
Sondai-aq, shara barysynda baiqaýdy ótkizýdiń jańa ózgeristeri týraly aityldy. «Buryn respýblikalyq deńgeide bir ǵana otbasy jeńimpaz bolatyn. Aǵymdaǵy jyldan bastap óńirlik deńgeide jeńimpaz atanǵan 17 otbasynyń barlyǵyna da Konkýrs laýreaty ataǵy berilip, birdei marapattalatyn bolady», - dep atap ótti A.Balaeva.
Sonymen birge, biyldan bastap konkýrsqa qatysýǵa ótinish berý, konkýrs nátijesi boiynsha marapattaý, konkýrs qorytyndylaryn anyqtaityn komissiia quramyna azamattyq qoǵam ókilderi ǵana emes, sonymen birge konkýrstyń burynǵy jeńimpazdarynyń da kirýi; jeńimpazdardy anyqtaý men baǵalaýdaǵy jańa balldyq júie boiynsha sharttyq ózgerister engizilgen.
Eske sala keteiik: «Mereili otbasy» ulttyq baiqaýyna Qujattar qabyldaý 15 maýsymǵa deiin jalǵasady. Baiqaý laýreattaryn marapattaý rásimi jyl saiynǵydai qyrkúiek aiynda, Otbasy kúni qarsańynda saltanatty túrde ótkiziledi.
