قر اقپارات جەنە قوعامدىق دامۋ مينيسترٸ ايدا بالاەۆانىڭ تٶراعالىعىمەن «مەرەيلٸ وتباسى» ۇلتتىق بايقاۋىن دايىنداۋ جەنە ٶتكٸزۋ جٶنٸندەگٸ جۇمىستى ٷيلەستٸرۋ, ۇيىمداستىرۋ كوميتەتٸنٸڭ وتىرىسى ٶتتٸ, دەپ حابارلايدى "ۇلت اقپارات".
ۇيىمداستىرۋ كوميتەتٸنٸڭ قۇرامىنا پارلامەنت سەناتىنىڭ دەپۋتاتى, قر پرەزيدەنتٸ جانىنداعى ەيەلدەر ٸستەرٸ جەنە وتباسىلىق-دەموگرافييالىق ساياسات جٶنٸندەگٸ ۇلتتىق كوميسسييا مٷشەلەرٸ, ٶڭٸر ەكٸمدەرٸنٸڭ ورىنباسارلارى, مينيسترلٸك, باق-نىڭ ٶكٸلدەرٸ, ٷەۇ-دار, بەلگٸلٸ قوعام قايراتكەرلەرٸ كٸردٸ.
ٶز سٶزٸندە مينيستر ا.بالاەۆا ادامگەرشٸلٸك قۇندىلىقتاردى جاڭعىرتۋعا جەنە وتباسى مەرتەبەسٸن ارتتىرۋعا باعىتتالعان ۇلتتىق كونكۋرستىڭ ەرەكشەلٸگٸ مەن ماڭىزدىلىعىن اتاپ ٶتتٸ.
«جىلداعى دەستٷرمەن بيىل دا «مەرەيلٸ وتباسى» ۇلتتىق كونكۋرسىن باستاعالى وتىرمىز. ەلباسىنىڭ ۇسىنىسىمەن قولعا العان جوبا – بٷگٸندە ناعىز حالىقتىق مەرەكەگە اينالدى. جىل سايىن بۇل جوباعا حالىقتىڭ ٷلكەن قىزىعۋشىلىقپەن قاتىسىپ جٷرگەنٸن كٶرٸپ وتىرمىز. جوبا باستالعاننان بەرٸ بٷگٸنگە دەيٸن ەلٸمٸزدٸڭ 15 مىڭنان استام جانۇياسى وسى بايقاۋعا قاتىستى. مۇنىڭ ٶزٸ – بٸزدٸڭ قوعامعا وتباسى قۇندىلىعىن دەرٸپتەيتٸن, ٷلگٸ كٶرسەتەتٸن ەرەكشە جوباعا اينالعانىن كٶرسەتەدٸ دەپ بٸلەمٸن», - دەدٸ ا.بالاەۆا.
سونداي-اق, شارا بارىسىندا بايقاۋدى ٶتكٸزۋدٸڭ جاڭا ٶزگەرٸستەرٸ تۋرالى ايتىلدى. «بۇرىن رەسپۋبليكالىق دەڭگەيدە بٸر عانا وتباسى جەڭٸمپاز بولاتىن. اعىمداعى جىلدان باستاپ ٶڭٸرلٸك دەڭگەيدە جەڭٸمپاز اتانعان 17 وتباسىنىڭ بارلىعىنا دا كونكۋرس لاۋرەاتى اتاعى بەرٸلٸپ, بٸردەي ماراپاتتالاتىن بولادى», - دەپ اتاپ ٶتتٸ ا.بالاەۆا.
سونىمەن بٸرگە, بيىلدان باستاپ كونكۋرسقا قاتىسۋعا ٶتٸنٸش بەرۋ, كونكۋرس نەتيجەسٸ بويىنشا ماراپاتتاۋ, كونكۋرس قورىتىندىلارىن انىقتايتىن كوميسسييا قۇرامىنا ازاماتتىق قوعام ٶكٸلدەرٸ عانا ەمەس, سونىمەن بٸرگە كونكۋرستىڭ بۇرىنعى جەڭٸمپازدارىنىڭ دا كٸرۋٸ; جەڭٸمپازداردى انىقتاۋ مەن باعالاۋداعى جاڭا باللدىق جٷيە بويىنشا شارتتىق ٶزگەرٸستەر ەنگٸزٸلگەن.
ەسكە سالا كەتەيٸك: «مەرەيلٸ وتباسى» ۇلتتىق بايقاۋىنا قۇجاتتار قابىلداۋ 15 ماۋسىمعا دەيٸن جالعاسادى. بايقاۋ لاۋرەاتتارىن ماراپاتتاۋ رەسٸمٸ جىل سايىنعىداي قىركٷيەك ايىندا, وتباسى كٷنٸ قارساڭىندا سالتاناتتى تٷردە ٶتكٸزٸلەدٸ.
