Otbasy kúni qarsańynda Qazaqstanda «Mereili otbasy» ulttyq baiqaýynyń jeńimpazdaryn marapattaý rásimi ótti. Kosolapovtar áýleti Qaraǵandy oblysynyń úzdik otbasy dep tanyldy, dep habarlaidy QazAqparat.
Biyl Qazaqstanda 17 jeńimpazdy marapattaý rásimi QR Memlekettik hatshysy Qyrymbek Kósherbaevtyń tóraǵalyǵymen onlain túrde ótti.
Memleket basshysynyń diplomyn, músinsheni jáne aqshalai sertifikatty Qaraǵandy oblysynan konkýrs laýreatyna óńir basshysy Jeńis Qasymbek tapsyrdy.
«Mine, birneshe jyl boiy biz barlyq qazaqstandyqtarǵa naǵyz otbasylyq qundylyqtardyń, eńbekqor, uiymshyl, tatý otbasynyń úlgisin kórsetý úshin úlgili otbasylardy tańdap kelemiz. Jalpy eńbek ótili 365 jyldan asatyn, bai eńbek tarihy bar kenshiler áýletin bizdiń oblysymyzdan jeńimpaz retinde kórip otyrǵanymyzǵa qýanyshtymyz», – dedi ol.
Kosolapovtar otbasy – tórt urpaqqa taraǵan kenshiler.
Otaǵasy Valerii Kosolapov Lenin atyndaǵy shahtada tik uńǵylardyń úńgileýshisi, al jubaiy Liýdmila Volokitina – aǵa tabelshi bolyp jumys isteidi.
18 jyl buryn neke qurǵan jáne qazirgi kúni eki ul tárbielep otyr.
«Biz osyǵan dein de «Mereili otbasy» baiqaýyna qatysqan bolatynbyz. 2017 jyly qalalyq týrda birinshi oryn aldyq. Bul jolǵy jeńis - biz úshin kútpegen oqiǵa boldy. Sebebi myqty jáne osy ataýǵa laiyqty qarsylastar kóp boldy. Biz - qarapaiym tatý jáne kópultty otbasymyz. Bizde dástúr sabaqtastyǵy saqtalǵan. Balalardy otbasylyq qundylyqtar rýhynda tárbieleimiz», – deidi Liýdmila Volokitina.
Jeńimpaz otbasynyń aitýynsha, olardyń shańyraǵynda ornaǵan baqytty nekeniń basty qupiiasy – ózara kómek pen túsinistik.
Erli-zaiyptylar úilenip, balalary bolǵannan beri «men» sózin umytyp, ony «biz» degenge aýystyrǵan.
