Qyzylorda oblysynyń ákimi Qyrymbek Kósherbaev «Mereili otbasy-2018» respýblikalyq baiqaýynyń diplomanttarymen kezdesti jáne olarǵa «Niva-Shevrole» avtokóliginiń kiltin tabys etti. Shieli aýdanynyń Ishanqulovtar otbasy 62 jyl birge ómir súrip, 14 balany dúniege ákelip, nemere, shóberelerin tárbieleýde.
Eske salaiyq, 2013 jyly Elbasy otbasylyq qundylyqtardy nasihattaý maqsatynda «Mereili otbasy» jalpyulttyq baiqaýyn uiymdastyrý týraly sheshim qabyldaǵan bolatyn. Qatysýshylardyń sany jyl saiyn artyp keledi, al Prezident baiqaýdyń besinshi jylynda Gran-pri ielerimen (Tarazdyq Niiazovtar otbasy) qatar, Qyzylordalyq Ishanqulovtar otbasy men álemge áigili Dimash Qudaibergenniń otbasylaryn da jeńimpaz dep tanydy.
Oblys ákimi Qyrymbek Kósherbaev qyzylordalyq jeńimpaz otbasyn quttyqtady.
«Qazaq halqy qashanda otbasyn qasietti shańyraq retinde baǵalap, zor mańyz berip, kóziniń qarashyǵyndai qorǵaǵan. Otbasynyń ar-namysyn saqtaýǵa, urpaq ósirip, tárbieleýge, óz urpaǵynyń elge adal qyzmet etýine asa mán bergen. Osyndai dástúrli qundylyqtar qazaqtyń qaimaǵy buzylmaǵan Syr óńirinde erekshe saqtalýy zańdylyq dep oilaimyz. Otbasy altyn uia, kieli shańyraq bolsa, sol shańyraqtyń murageri, urpaq jalǵasy balalar bolyp tabylady. Balalarynyń boiyna ulttyq qundylyqtardy sińirip tárbielep otyrǵan Syr eliniń Sizder siiaqty ónegeli otbasylaryna aitar alǵysymyz sheksiz»,-dedi aimaq basshysy.
Shieli aýdany, Eńbekshi aýylynyń turǵyny, otaǵasy Erǵali Ishanqulov erte jasynan mal sharýashylyǵymen ainalysady, súiikti kásibin zeinetkerlikke shyqqan soń da jalǵastyrýda. Jary «Altyn alqa», «Kúmis alqa» tósbelgisiniń iegeri Bahira apamen 62 jyl bir shańyraq astynda ómir súrip, 14 ul-qyzdy dúniege ákelgen. Búgingi tańda 61 nemere, 46 shóbere, 1 shópshek súiip otyrǵan bul áýlettiń ónegeli ómiri - elge úlgi. Ishanqulovtar januiasynyń 8 uly men 6 qyzy urpaq órbitip, ár salada tabysty eńbek etýde.
Memleket basyshysynyń atynan oblys ákimi Ishanqulovtar otbasyna «Niva –Shevrole» kóliginiń kiltin tabystady.
Óz kezeginde, Erǵali aǵa Elbasy men aimaq basshysyna qoldaý kórsetkenderi úshin alǵysyn aityp, barlyq qazaqstandyqtarǵa bereke-birlik tiledi.
Atap óteiik, «Mereili otbasy – 2018» baiqaýynyń erejesine sáikes ulttyq kezeńge qatysýǵa oblystan bas júlde alǵan Báimenovter men birinshi júldeli Ishanqulovtar otbasy usynyldy. Nátijesinde Ishanqulovtar otbasy baiqaýdyń diplomanty atandy.
