Aldaǵy kóktem merekeleri qarsańynda «Jolaýshylar tasymaly» AQ qosymsha birjolǵy poiyzdardy jolǵa shyǵarady, dep habarlaidy "Ult aqparat".
Naqty aitqanda, atalǵan kompaniia deregine sáikes, №202/201 «Astana-1-Pavlodar» poiyzy qatynaityn bolady. Jolaýshylar kóligi Astana-1-den 20, 24 naýryz kúnderi jóneltiledi, al Pavlodardan 21, 25 naýryz kúnderi keri shyǵady. №204/203 «Astana-1-Almaty-1» poiyzy Astana-1-den 20, 24 naýryz kúnderi, al Almaty-1-den 21, 25 naýryz kúnderi; №205/206 «Almaty-2-Arys-1» poiyzy Almaty-2-den 7, 21 naýryz kúnderi, al Arys-1-den 9, 23 naýryz kúnderi qatynaidy. №241/242 «Qyzylorda-Atyraý» poiyzy Qyzylordadan 20, 22, 24 naýryz kúnderi, al Atyraýdan keri baǵytta 21, 23, 25 kúnderi júredi.
Sonymen qatar, №49/50 «Almaty-2-Oral» baǵytyndaǵy poiyzdyń qosymsha quramy Almaty-2-den 13 naýryz kúni shyqsa, Oral qalasynan 16 naýryz kúni keri qatynaidy.
«Kompaniia ár ýaqytta poiyzdardyń jolaýshylarmen tolýyn qadaǵalap, arnaiy saraptama júrigizip otyrady. Osy saraptamanyń negizinde jolaýshylar tarapynan suranysty qanaǵattandyrý úshin qosymsha vagondar men poezdar iske qosylady. Aldaǵy merekeler qarsańynda ulttyq tasymaldaýshy vagon parkin 100 paiyz paidalanýdy kózdep otyr», - dep atap ótedi kompaniiadan.
