Qostanai oblystyq aýrýhananyń №3 korpýsyn kúrdeli jóndeý kezinde quny 141,2 mln teńgege baǵalanǵan meditsinalyq jabdyqtyń joǵalǵany anyqtaldy. Bul derek boiynsha «asa iri kólemdegi urlyq» baby negizinde qylmystyq is qozǵaldy, dep habarlaidy ult.kz.
Qostanai oblystyq prokýratýrasynyń málimetinshe, is aýrýhana bas dárigeriniń aryzy boiynsha tirkelgen. Aýdit barysynda buryn ornatylyp, aqshasy tolyq tólengen birqatar meditsinalyq jabdyqtyń ornynda joq ekeni anyqtalǵan.
Oblystyq densaýlyq saqtaý basqarmasynyń deregine sáikes, aýrýhananyń №3 korpýsyn jóndeý jobasynyń jalpy quny 1 mlrd teńgeden asady. Onyń shamamen jartysy igerilgenimen, qurylys-montaj jumystary áli aiaqtalmaǵan.
Daýly joba birneshe jyldan beri sot protsesterimen jáne merdiger uiymmen kelispeýshiliktermen qatar júrip keledi. Basqarmanyń málimetinshe, merdiger belgilengen merzimde mindettemelerin oryndamaǵan, qurylys alańynda jumysshylar sany jetkiliksiz bolǵan jáne nysan ýaqytynda tapsyrylmaǵan. Nátijesinde kelisimshart buzylyp, bul sheshimdi sot zańdy dep tanyǵan.
2025 jylǵy tekserý kezinde komissiia nysanda kúzet bolmaǵanyn jáne buryn ornatylǵan meditsinalyq jabdyqtardyń bólshektelgenin anyqtady. Keiin júrgizilgen aýdit nátijesinde 141,2 mln teńgeniń jabdyǵy jetispeitini belgili boldy.
Qazirgi tańda tergeý amaldary júrgizilip jatyr. Al aýrýhananyń josparlanǵan bólimsheleri ýaqytsha basqa meditsinalyq mekemelerde jumysyn jalǵastyrýda. Nysandy tolyq aiaqtap, paidalanýǵa berý 2026–2027 jyldarǵa josparlanǵan.
Aimaqtaǵy taǵy bir uzaqqa sozylǵan joba – balalar oblystyq aýrýhanasyn jańǵyrtý. 2021 jyly bastalǵan jóndeý jumystary áli kúnge deiin aiaqtalmaǵan. Qazir joba qaitadan memlekettik saraptamadan ótip jatyr, al qurylys jumystarynyń naqty merzimi ázirge belgisiz.
