Búgin «Nur Otan» sezi Qasym-Jomart Toqaevtyń kandidatýrasyn bekitti. Osyǵan orai, QR Parlament Senatynyń depýtaty Birǵanym Áitimova óziniń burynǵy basshysy týraly aityp berdi, dep habarlaidy QazAqparat tilshisi.
«Menińshe, basqa kandidattarǵa qiyndaý bolady. Sebebi Qasym-Jomart Toqaev - óz jumysyna da, sheshimderine de berik adam. Sosyn óte jaýapty ári saýatty. Barlyq salalardy jaqsy biledi. Halyqaralyq deńgeide de solai. Birikken Ulttar Uiymynda jumys istegende ózin kásibi menedjer retinde kórsete bildi. Atalǵan uiymnyń Jenevadaǵy bólimshesin jańǵyrtýǵa úlken úles qosty. Sol sebepti ony «relable» (senimdi adam - avt.) retinde moiyndady. Ol kez kelgen baǵdarlamany basqarýdy ǵana emes, ony iske asyrý tetikterin de biledi», - dedi B.Áitimova jýrnalisterge bergen suhbatynda
Senator «Nur Otan» partiiasynyń atynan prezident sailaýyna Qasym-Jomart Toqaevtyń kandidatýrasy usynylatynyn ishtei joramaldaǵan. Sol sebepti sezde esh irkilmei, kandidat úshin daýys berdi.
«Elbasy Nursultan Nazarbaevty álem boiynsha moiyndaidy. Ol Qasym-Jomart Toqaevty prezidenttikke usynsa, oǵan senýge ábden bolady. Sosyn men ózim Toqaev myrzanyń qaramaǵynda jumys istedim jáne ony adam retinde jaqsy bilemin. Máselen, búgin Qasym-Jomart Toqaev adaldyq pen ádeptilik týraly aitty. Ol - ózi de sondai adam. Ony senimdi túrde aita alamyn», - dep atap kórsetti B.Áitimova.
Aita keteiik, búgin Elbasy «Nur Otan» partiiasynan QR Prezidenttigine úmitker retinde Qasym-Jomart Toqaevtyń kandidatýrasyn usyndy. «Nur Otan» sezi Qasym-Jomart Toqaevtyń kandidatýrasyn biraýyzdan bekitti.
