QR Bas memlekettik sanitariialyq dárigeri Jandarbek Bekshin meningokokke qarsy vaktsinanyń ózindik qunyn atady, dep habarlaidy QazAqparat tilshisi.
«Bul kommertsiialyq vaktsina jáne ol úlken jáne kishi qajylyqqa baratyndarǵa arnalǵan edi. 4600 doza ákelinip, 22 500 teńgeden satylǵan. Alaida, qajylyq tamyz aiynda ótetin bolǵandyqtan bul vaktsina naryqqa shyǵaryldy», - dedi Jandarbek Bekshin Ortalyq kommýnikatsiialar qyzmetindegi brifingten keiin agenttik tilshisiniń saýalyna orai.
Onyń aitýynsha, qazir taǵy da vaktsina jetkizilip, olar densaýlyq saqtaý basqarmalary arqyly qalalyq emhanalarǵa jetkiziletin bolady.
«Olarda ekpe jasaityn kabinetter bolǵandyqtan shyǵyndardy qysqartýǵa múmkindik bar. Iaǵni, shprits pen maqta shyǵyny qosylyp, ústeme baǵasy azaiady. Birinshi partiiany jeke uiymdar satyp alǵannan jáne olar tapshylyqty paidalanyp baǵany ózderi qoiyp otyr. Al vaktsinanyń ózindik quny 17500 teńgeni quraidy», - dedi Bas sanitar dáriger.
Búgin Úkimet otyrysynda Premer-Ministr Baqytjan Saǵyntaev Densaýlyq saqtaý ministrligine meningokokke qarsy vaktsina baǵasyn tómendetýdi tapsyrǵan bolatyn.
Aita keteiik, jyl basynan beri Qazaqstanda meningit infektsiiasymen 58 naýqas tirkeldi. Olardyń 18-i 14 jasqa deiingi balalar. Dertten 13 adam kóz jumdy, sonyń ishinde beseýi 14 jasqa deiingi jetkinshekter ekendigin belgili.
