Otbasy qaida turyp jatqany jaiynda ár depýtat ózi jaýap berýi kerek. Bul pikirdi Májilis tóraǵasy Erlan Qoshanov aitty, dep habarlaidy QazAqparat.
Májilistiń jalpy otyrysynan keiin tilshiler Qoshanovtan burynǵy depýtat jáne qazirgi Ǵylym ministri Saiasat Nurbektiń otbasy shetelde turyp jatqany qanshalyqty etikaǵa sai keletinin surady.
«Meniń oiymsha, keshe Saiasat Nurbek óziniń otbasy ne sebepti shetelde ekenin túsindirgen siiaqty. Ekinshiden, ol tórt ai buryn ǵana depýtat retinde keldi. Oǵan deiin Saiasat Nurbek depýtat bolmaǵan edi. Iaǵni salyq tóleýshiler esebinen biýdjetten jalaqy almady. Sondyqtan bul onyń tańdaýy boldy», - dedi Májilis tóraǵasy.
Osy oraida ol qandai da bir tekserý bolmaitynyn aitty.
«Ár depýtat sizderdiń, halyqtyń aldynda balalary qaida oqyp jatqany, otbasy qaida turyp jatqany jaiynda ózi jaýap berýi kerek. Men ózime qatysty jaýap bere alamyn, meniń balalarym qarapaiym mektepte bilim aldy», - dedi Qoshanov.
Sonymen qatar ol Májiliste etika komissiiasy bar ekenin, depýtattarǵa qatysty másele onda qaralmaǵanyn aitty.
Jaqynda Ǵylym jáne joǵary bilim ministri laýazymyna taǵaiyndalǵan Saiasat Nurbek balalaryn nege shetelde oqytqanyn túsindirdi.
«Onyń úsh sebebi bar, eń aldymen jubaiymnyń densaýlyǵynda kinárat bar, oǵan naqty meditsinalyq usynym da bar. Ekinshiden, balalarymdy Qazaqstandaǵy jeke mektepterde oqytýǵa qarajatym jetpedi, úshinshiden, Kiprde britandyq formattaǵy jaqsy aǵylshyn mektebi boldy. Biraq ýaiymdamańyzdar, 26 maýsym kúni balalarym Qazaqstanǵa ushyp keledi», - dep jaýap berdi ministr.
