QR mádeniet jáne sport ministri Arystanbek Muhamediuly súiikti ánshileri men áleýmettik jelide kimdi turaqty oqitynyn málimdedi, dep habarlaidy Sputnik Qazaqstan tilshisi.
Ministr "Ninety One" tobynyń ónerine qarsy bolmasa da, ánderin tyńdamaitynyn aitty.
"Men kóbinese klassikalyq janrdy tyńdaimyn. Biraq "Ninety One" toby halyqtyń, jastardyń kóńilinen shyǵyp, joǵary dárejege jetip jatsa, árine bul óte qýanyshty jaǵdai. Negizinen bizde ónerdiń barlyq salasy bolýy kerek. Sondyqtan "Ninety One" tobynyń halyq aldynda óner kórsetip júrgenderine qýanyshtymyn", — dedi ministr "Jas Otan" jastar qanatynyń IV sezinde.
Muhamediuly "Ninety One" solisteriniń syrǵa taǵyp, shashyn túrli túske boiaitynyn quptamaidy eken.
"Shynyn aitqanda, men dástúrli kózqarastaǵy azamatpyn. Ony (syrǵa taǵý – avtor eskertp.) onsha quptamaimyn. Meniń eki ulym bar, ekeýi de sportpen ainalysady, kitap oqidy, bilimge qushtar. Biraq árkimniń qalaýy, erki ózinde. Ony shekteýge eshkimniń quqyǵy joq. Biraq uldarymnyń syrǵa taǵýyna qarsy bolamyn", — dedi ministr.
Osy oraida Muhamediuly óziniń súiikti ánshilerin atady.
"Súiip tyńdaityn ánshiler kóp. Máselen, Eskendir Hasanǵaliev, "Mýzart" toby, dástúrli ánshi Bekbolat Tileýhan, Jeńis Seidollauly. Dimash Qudaibergenmen jumys istedik, onyń ánderin de tyńdaimyn. Buryn qazaq ánshileri úlken stadionǵa shyǵa almaityn. Qazir Qudaiǵa shúkir, múmkindik zor. Bizdiń qazaq estradasy qazir óte joǵary deńgeide. Ánshilerimiz shetel asyp jatyr. Dimashtan basqa, Qairat Nurtas shetelde óner kórsetti, jaqynda Madina Sádýaqasova Qytaiǵa baryp keldi. Munyń bári jetistik", — dedi ol.
Sonymen qatar, mádeniet ministri áleýmettik jelide kimderdi turaqty oqyp otyratynyn aitty.
"Ókinishke qarai, áleýmettik jelilerde kóp otyratyn ýaqytym joq. Feisbýkte tirkelgenmin, Muhtar Taijan, Serik Abbas-Shahty turaqty túrde oqyp turamyn. Kúnine 10-15 minýt qana bólemin jelige", — degen Muhamediuly atyshýly bloger Aijan Baizaqovany oqymaitynyn atap ótti.
