Aǵymdaǵy jyly tamyzdyń 29-y kúni Semei poligonynyń jabylǵanyna 25 jyl tolady. Osyǵan orai, Birikken Ulttar Uiymynyń Bas hatshysy Pan Gi Mýn arnaiy úndeýdi jasady. Atalǵan úndeýdiń mátini BUU-nyń resmi saitynda jariialanyp otyr, dep habarlaidy Baq.kz tilshisi QR Syrtqy ister ministrliginiń resmi saityna silteme jasap.
2016 jyly tamyzdyń 29-ynda kezekti ret Iadrolyq synaqtarǵa qarsy is-qimyldyń Halyqaralyq kúni atalyp ótpek. Osy data Qazaqstannyń bastamasymen 2009 jyly BUU Bas Assambleiasynyń rezoiýtsiiasymen qabyldanǵan bolatyn. Bul kún uiymǵa múshe elder, akademiialyq mekemeler, jastar uiymdary men buqaralyq aqparat quraldaryn belsendilik tanytyp, qaýipsiz álemdi qalyptastyrý jolynda iadrolyq synaqtarǵa tyiym salýdyń qajettiligi jaiynda aityp, jan-jaqty aqparat taratýǵa úndeidi.
«Tamyzdyń 29-y kúni barsha álem qaýymdastyǵy Qazaqstandaǵy Semei poligonynyń jabylǵanyna shirek ǵasyrdyń tolýyn atap ótpek. Ol jerde 450 iadrolyq synaq jasaldy. 2010 jyly men Semei jerinde boldym. Sol kezde ýlanǵan jerlerdi kórdim. Poligonnyń qurbandaryn da kórip, olardyń ómirge degen qushtarlyǵyna, batyldyǵyna tánti boldym. Men sol adamdardyń iadrolyq qarýdan ada álemdi qalyptastyrý ustanymyna tolyq qosylamyn. Barlyq iadrolyq synaqtarǵa tyiym salý arqyly biz adam jiirkenetin muradan qutyla alamyz», - deidi BUU Bas hatshysy.
Onyń aitýynsha, iadrolyq qarýdan bas tartý bastamasy qarýsyzdandyrý salasyndaǵy basqa da sharalarǵa óz septigin tigize alady. Osy oraida Pan Gi Mýn barlyq memleketterdi osydan 20 jyl buryn BUU Bas Assambleiasy qabyldaǵan Iadrolyq synaqtarǵa jappai tyiym salý týraly kelisimge qosylýǵa úndedi. Atalǵan qujat áli kúnge deiin kúshine engen joq.
