Búgin - qazaqtyń aqiyq aqyny, Qazaqstannyń halyq jazýshysy, KSRO jáne Qazaqstan Memlekettik syilyqtarynyń laýreaty Juban Moldaǵalievtiń (1920-1988) týǵan kúni, dep habarlaidy "Ult aqparat".
Biyl aqynnyń týǵanyna týra 100 jyl tolyp otyr.
Juban Moldaǵaliev Batys Qazaqstan oblysy burynǵy Taipaq (qazirgi Aqjaiyq) aýdanynyń Jylandy degen jerinde ómir esigin ashqan.
1940 jyly Oral aýyl sharýashylyǵy tehnikýmyn bitirgennen keiin 1947 jylǵa deiin ásker qatarynda bolyp, Uly Otan soǵysyna qatysty.
1948-1952 jyldary respýblikalyq «Leninshil jas» (qazirgi «Jas Alash») gazetinde bólim meńgerýshisi, jaýapty hatshy, bas redaktordyń orynbasary, 1955-1956 jyldary «Qazaq ádebieti» gazeti bas redaktorynyń orynbasary, al 1958-1963 jyldary «Juldyz» jýrnalynyń bas redaktory qyzmetin atqardy.
1953-1954 jáne 1963-1971 jyldary Qazaqstan Jazýshylar odaǵy basqarmasynyń ekinshi hatshysy, 1979-1983 jyldary birinshi hatshysy boldy. Ol sondai-aq KSRO Jazýshylar odaǵy basqarmasynyń, KSRO Ministrler Keńesi janyndaǵy ádebiet, kórkemóner jáne arhitektýra salasyndaǵy Lenindik jáne Memlekettik syilyqtar jónindegi komitetiniń, «Novyi mir» jýrnaly men «Biblioteka poeta» basylymy redaktsiialyq alqasynyń múshesi qyzmetin atqaryp, KSRO jáne Qazaqstan Joǵary Keńesteriniń depýtaty bolyp sailandy.
Ataqty aqynnyń tyrnaqaldy týyndylary Oral qalasynda jaryq kórdi. Atap aitqanda, onyń alǵashqy óleńi 1939 jyly oblystyq «Komsomol urpaǵy» gazetinde basylǵan. Sol jyly oblystyq «Ekpindi qurylys» gazetinde (qazirgi «Oral óńiri») «Meniń antym», «Kel, joldastar, jyrlaiyq» óleńderi baspa júzin kórdi. Tuńǵysh jinaǵy «Jeńis jyrlary» degen atpen 1949 jyly basyldy. Sodan keiingi jyldary aqynnyń alpystan astam kitaby jaryq kórip, ataǵy jalpaq álemge jaiyldy. Ásirese, 1964 jyly «Men - qazaqpyn» atty poemasyn shyǵarýy ádebiet álemin dúr silkindirdi. Sol kezdiń ózinde-aq «Men - qazaqpyn!» dep aidai álemge jar salyp, týǵan halqynyń ótken ómiri men qily taǵdyry týraly tebirene jyrlaýy aqynnyń dańqyn kókke kóterdi.
Onyń qalamynan «Jesir taǵdyry», «Qyran dala», «Sel», «Baiqońyr baspaldaqtary» syndy poemalar týdy.
Al «Kisen ashqan» poemasy úshin 1970 jyly Qazaqstan Memlekettik syilyǵy berildi. Arada segiz jyl ótkende KSRO Memlekettik syilyǵyn ielendi. Óleńderi men dastandary kóptegen shetel tilderine aýdarylyp, óz baǵasyn aldy. KSRO Qorǵanys ministrligi syilyǵynyń laýreaty jáne A.Fadeev atyndaǵy altyn medaldiń iegeri. Ol Lenin, eki márteden Eńbek Qyzyl Tý jáne ekinshi dárejeli Otan soǵysy, sondai-aq «Qurmet Belgisi» ordenderimen marapattalǵan. 1985 jyly «Qazaqstannyń halyq jazýshysy» ataǵy berildi.
«Men - qazaqpyn!» dep jyrlap qana qoimai, Juban qysyltaiań sátte halqyn qorǵai bilgen uly tulǵa edi. Buǵan 1986 jyly 31 jeltoqsanda Qazaqstan Jazýshylar odaǵyna kezdesýge kelgen Qazaqstan Kompartiiasy ortalyq komitetiniń sol kezdegi birinshi hatshysy G.Kolbinge qaimyqpai aitqan ataqty sózi dálel. Aiaýsyz soqqy jep, itke talanǵan qazaq jastaryna arasha túsken aqynnyń bul has erligi edi.
