Foto: Smartnews.kz
Mańǵystaý oblysynyń ákimi Nurdáýlet Qilybai ortalyq kommýnikatsiia qyzmetinde ótken brifingte jeke ómirine qatysty janjalǵa ashyq jaýap berdi, dep habarlaidy Ult.kz Ertenmedia.kz portalyna silteme jasap.
Ákim birneshe jyl boiy álemjeli men aqparat quraldarynda aitylyp júrgen máslihattyń burynǵy depýtaty Yntash Naýryzovamen ortaq balasy bar ekeni týraly máseleni túsindirdi.
Jýrnalist ákimge osy oqiǵa nege birneshe jyldan keiin ǵana jariia bolǵanyn jáne onyń repýtatsiiasyna qalai áser etkenin surady.
«Bul óte-móte jeke másele, degenmen jaýap bereiin. Álemjelide keibir áriptesterińiz sot meni DNQ saraptamasy arqyly balany moiyndaýǵa mindettedi dep jazdy.
Shyn máninde jaǵdai múldem basqasha. Men balany moiyndaý úshin sotqa óz erkimmen ótinish berdim. Sot meniń ótinishimdi qanaǵattandyrdy. Qazir zań boiynsha aliment tólenip otyr», – dedi ákim.
Aliment kólemin naqty atamaǵan ákim, shamamen jalaqysynyń 20-25 paiyzy ekenin aitty.
«Buǵaltyrdan naqty anyqtaý kerek. Jalpy jalaqym 1,9 million teńge. Qolǵa alatynym osy somadan aliment ustalǵandaǵy qalǵan qarajat», – dedi Qilybai. Óńir basshysy osy jaǵdai úshin ókinetinin de jasyrmady.
«Iá, bul kezinde jibergen qateligim. Ókinishke qarai, ótkendi ózgertý múmkin emes. Dál qazir esil-dertim óńirdi damytý. Árine, bul oqiǵa men úshin jaǵymdy emes», – dedi ákim.
Sonymen qatar ákim qazir burynǵy máslihat depýtaty Yntash Naýryzovadan týǵan balamen aralaspaitynyn jetkizdi. Aita keteiik, Nurdáýlet Qilybai úilengen, bes balasy bar.
