Prezidenttikke kandidat Saltanat Tursynbekova Qostanaida quqyq qorǵaýshylarmen jáne zańgerlermen kezdesý ótkizdi. Onda ol eldegi basshylyq qyzmettegi áielderdiń quzyrettiligi tómen ekenin aitty.
«Qazaqstandaǵy basshylyq laýazymdardaǵy genderlik ókildiktiń jaǵdaiy asa máz emes. Áielder el halqynyń basym bóligin qurasa da, basshylyq qyzmettegi áielder sany óte az. Quzyrettilik joqtyǵynan áielderdiń pikiri eskerilmeidi», - dedi ol.
Ulttyq statistika biýrosynyń málimeti boiynsha Qazaqstan Respýblikasynyń halqy 19 million adamdy quraidy, onyń 52 paiyzy – áielder. 2020 jylǵy esepke sáikes, elimizde jumys isteitin árbir ekinshi áieldiń (47,3%) joǵary nemese joǵary oqý ornynan keiingi bilimi boldy. Joǵary bilimdi jumyspen qamtylǵan erlerdiń úlesi nebári 38,1% quraidy.
«Bizdiń elde áielder kóp, olardyń arasynda bilimdisi de kóp. Biraq basshylyq qyzmetterde kózge kórinetin teńgerimsizdik bar. Oǵan myna jaǵdailardy mysal retinde alýǵa bolady: qazir bizde oblys nemese respýblikalyq mańyzy bar qalanyń birde-bir áiel ákimi joq. Tek eki áiel ministr bar. Sodan keiin olar ádettegidei áielder ǵana basqaratyn - densaýlyq saqtaý men áleýmettik qorǵaý salalary. Parlamenttegi áielderdiń sany úshten birine de jetpeidi», - deidi ol.
Sondai-aq spiker partiialyq tizimderge áielder men jastardyń kem degende 30 paiyzy kirýi kerek degen kvota týraly da aitty.
«Búginde zańnamada áielder quqyǵyn shekteitin belgili bir 30%-dyq kvotalar qarastyrylǵan. Men bul kvotalarmen múlde kelispeimin. Basqa eshbir elde mundai nárse is júzinde jasalyp jatqan joq. Bul 30%-dyq norma bolatyndai qandai da bir ónim emes qoi. Men áiel de er azamattar isteitin barlyq laýazymdarda qyzmet etýi kerek dep esepteimin. Quzyrettilik teń bolýy kerek! Eger bizde halyqtyń 52 paiyzy áielder bolsa, Parlamenttegi, kvazimemlekettik sektordaǵy, kez kelgen saladaǵy áielderdiń úlesi kem degende 50 paiyz bolýy tiis. Men óz baǵdarlamamda genderlik teńdik týraly da aityp júrmin», – deidi Saltanat Tursynbekova.
Eske salaiyq, Qostanai oblysy – kandidattyń sailaý aldyndaǵy úgit-nasihat sapary aiasyndaǵy jetinshi óńir. Munda ol №4. emhananyń dárigerlerimen kezdesý ótkizdi. Quqyq qorǵaýshy buǵan deiin elordada, Almaty, Shymkent qalalarynda, Qaraǵandy, Aqmola jáne Túrkistan oblystarynda bolǵan.
