Memleket basshysy Qasym-Jomart Toqaev Parlament Májilisiniń otyrysynda memorgandardaǵy biýrokratiiany joiýdyń joldaryn usyndy, dep habarlaidy QazAqparat.
«Taǵy bir másele – biýrokratiianyń etek jaiýy. Ol azamattardyń sanasynda memlekettik apparat týraly baiaý jumys isteitin nemquraily mashina degen ádil túsinik qalyptastyrady.
Biýrokratiia – reformalardyń sapasyz oryndalýynyń negizgi sebepteriniń biri. Mundai aýrýdan bárimizge emdelý kerek. Reformanyń formasy emes, mazmuny basymdyqqa ainalýy kerek. Esep úshin esep berý, baqylaý úshin baqylaý júrgizý tásilderi ótkenniń enshisinde qalýǵa tiis. Úderisten aqyrǵy nátije mańyzdy. Ózin-ózi aqtamaityndai deńgeide kúrdelindirilgen jáne úderisti shynymen baiaýlatatyn sheshimderdiń bári joiylýy kerek», - dedi Prezident.
Onyń paiymynsha, qazir memorgandar tapsyrmalardy iske asyrýda biýrokratiialyq jaǵyna kóp mán beredi.
«Formasy boiynsha úlgili, biraq mazmuny boiynsha qatty suryptalǵan qujattar ázirlenip jatyr. Negizgi integratsiialyq júielerdiń bar bolǵanyna qaramastan, memorgandar makýlatýrany qaptatyp, mánsiz hat almasýyn qoiar emes. Memlekettik organdardyń atalmysh aqparattyq júielerin qaǵazben dáleldeýdi qajet etpeitin resmi resýrs dep taný kerek. Olai bolmasa, tsifrlandyrýdy ne úshin engizip jatyrmyz?
Tsifrlandyrý sándi oiynshyq emes qoi. Ol memlekettik apparat fýnktsiiasyna qoldaý turǵysynan paidaly bolýy qajet», - dedi Memleket basshysy.
