Memleket óziniń áleýmettik mindettemelerin tolyq oryndady. Bul týraly Májilistiń jalpy otyrysynda QR Úkimetiniń 2019 jylǵy respýblikalyq biýdjettiń atqarylýy týraly esebin qaraý kezinde Qarjy ministri Erulan Jamaýbaev málim etti, dep habarlaidy QazAqparat.
«Ótken jyly biýdjet shyǵystary esebinen 344 biýdjettik baǵdarlamany qarjylandyrý arqyly 53 strategiialyq baǵyt júzege asyryldy. Strategiialyq josparlardyń 264 indikatoryna qol jetkizildi. 13 memlekettik baǵdarlama qarjylandyryldy. Sonyń ishinde, «Nurly jol» memlekettik baǵdarlamasy aiasynda myńdaǵan turaqty jumys orny ashyldy. Tranzittik júk kólemi 20 mln tonnaǵa jýyqtady. 115 shaqyrym jylýmen jabdyqtaý, sýmen jabdyqtaý jáne sý burý jelileri salyndy jáne rekonstrýktsiialandy», - dedi ministr.
Onyń sózine qaraǵanda, «Nurly jer» baǵdarlamasy aiasynda 19 myńnan astam páter halyqtyń áleýmettik osal toptaryna, kópbalaly otbasylarǵa jáne jumys isteitin jastar úshin paidalanýǵa berildi. «Eńbek» baǵdarlamasy baǵytynda 22 myń jas tehnikalyq kásiptik oqýmen qamtyldy, 19 myń adam mikrokredit pen grant aldy. Alǵash ret shamamen 6 myńǵa jýyq jas jeke isin ashty jáne keńeitti.
«Jalpy memleket óziniń áleýmettik mindettemelerin tolyq oryndady. Alaida, memlekettik josparlaý júiesinde birqatar máseleler de bar. Bul týraly Úkimettiń esebine Esep komitetiniń qorytyndysynda qamtyldy. Osyǵan bailanysty memlekettik josparlaý júiesin jetildirý úshin Úkimette tiisti sharalar daiyndalýda. Atap aitqanda, memlekettik baǵdarlamalar men strategiialyq josparlardyń nysanaly indikatorlaryn ózgertýge tyiym salynatyn bolady. Memlekettik baǵdarlamalarda qarjylyq qoldaý alýshy kásipkerlerdiń qarsy mindettemeleriniń túrleri de qarastyrylady», - dedi E. Jamaýbaev.
Onyń atap ótýinshe, Úkimet Májilistiń qaraýyna biýdjet zańnamasyna ózgerister men tolyqtyrýlar engizý týraly zań jobasyn engizedi. Bul jobada strategiialyq jáne biýdjettik josparlaý júiesiniń mehanizmderin qaita qaraý, biýdjettik investitsiialardyń boljamdyq ekonomikalyq tiimdiligin baǵalaý normasyn engizý, kásipkerlerge memleket tarapynan qoldaý sharalaryn jetkizetin operatorlarǵa qazynashylyq organdarda arnaiy shot ashý qarastyrylǵan. Barlyq usynylǵan ózgerister biýdjettik protsesti jetildirýge baǵyttalǵan.
