1 qarasha kúni Pavlodardaǵy «Qoǵamdyq kelisim» KMM-niń májilis zalynda «Qazaqsha sóileý ońai!» til jobasynyń ashylýy ótti. Bul joba «Rýhani jańǵyrý» baǵdarlamasyna sáikes, oblystyq Qazaqstan halqy assambleiasynyń «Uly dalanyń máńgilik tili» jobasyn júzege asyrý sheńberinde ázirlendi.
«Qazaqsha sóileý ońai!» til jobasy – jastardy ulttyq rýhani qundylyqtardy (mádeniet, salt-dástúr, ádet-ǵuryp) zerdeleý arqyly, memlekettik tildi qoldaný jáne ony úirenýdi keńinen nasihattaýǵa, jastardyń memlekettik tildi meńgerý daǵdylaryn damytýǵa, ony ómirde qoldanýǵa baǵyttalǵan.
Jobanyń negizgi iske asyrýshylary Pavlodar oblysynyń Qazaqstan halqy assambleiasy, «Qoǵamdyq kelisim» kommýnaldyq memlekettik mekemesi, oblystyq QHA jastar birlestiginiń jastar úilestirý keńesi jáne «Serpin iskerleri» qoǵamdyq birlestigi bolyp tablady.
«Qazaqsha sóileý ońai!» jobasy memlekettik tildi bilmeitinder men «Serpin» baǵdarlamasy boiynsha bilim alatyn stýdentten turatyn jupqa bólingen, 14-29 jas aralyǵyndaǵy jastarǵa baǵyttalǵan. Juptar birlesip qarym-qatynas jasaý arqyly qazaq tilin ońai meńgeredi dep kózdelýde. Sondai-aq, jobany júzege asyrý barysynda qazaq tilin úiretýshi, tájiribemen bólisetin jetekshi jastarǵa aqparattyq qoldaý kórsetý qarastyrylady.
Oblystyq QHA jastar birlestiginiń jastar úilestirý keńesiniń tóraǵasy E. Paýli osy is-sharanyń moderatory boldy. Onyń aitýynsha jobanyń maqsaty: qazaqstandyq birtektilikti qalyptastyrý, memlekettik tildi úiretý arqyly qoǵamdyq kelisimdi jáne ultaralyq birlikti nyǵaitý, memlekettik tildi meńgerý arqyly jastardyń qoǵamdaǵy belsendiligin arttyrý, sonymen qatar, memlekettik tildi úirenýdiń jańa formattaryn izdeý jáne úiretý metodikasynyń sapasyn arttyrý bolyp tabylady.
Jobany júzege asyrý sheńberinde apta saiyn treningter, forsait-sessiialar ótkiziledi jáne eń bastysy, memlekettik tildi bilmeitin jastar «Serpin» baǵdarlamasy boiynsha bilim alatyn stýdenttermen topta qarym-qatynas jasaidy. Árbir apta saiyn jetekshi qazaq tilin úirenýshilerge upai qoiady. Al qazaq tilin joǵary deńgeide meńgergen azamattardyń attary «Til - birlik tiregi» atty qorytyndy is-sharasynda jariialanady. Joǵary dárejege jetken qatysýshylarǵa sertifikattar berilip, diplomdarmen jáne qundy syilyqtarmen marapattalady.
«Memlekettik tildiń qoldanylý aiasy men onyń qoǵamdaǵy rólin arttyrý, qazaqstandyq birtektilik, turaqtylyq pen birlikti nyǵaitýǵa atsalysý, jalpy ulttyq «Máńgilik El» patriottylyq ideiasynyń qundylyqtaryn ilgeriletý, memleketgik tildiń qajettiligin arttyrý, ony keńinen qoldaný arqyly ózge ult ókilderiniń tildi meńgerýin qamtý – jobanyn basty maqsattary bolyp tabylady», - dep atap ótti E. Paýli.
«Joba taqyryby óte qyzyqty, ol bizdiń memlekettik tildi meńgerýge bailanysty tańdalǵan. Memlekettik tildi bilý – bul bizdiń azamattyq paryzymyz jáne ýaqyttyń talaby. Qazaq tili óte bai jáne qazirgi kezde ony meńgerýge mol múmkindikteri bar. Menińshe, qazaq tilin bilý, úirený – bul orys tildi jastardyń rýhani baiýyna jeteleidi. Biz óz eliniń patriottary retinde, óz ana tilimizdi damytýymyz kerek», - dep atap ótti tarih ǵylymdarynyń doktory, S.Toraiǵyrov atyndaǵy PMÝ QHA kafedranyń meńgerýshisi, professor Mamytova Sáýle Násenqyzy.
Sondai-aq, Pavlodar memlekettik pedagogikalyq institýtynyń stýdentteri, «Serpin» baǵdarlamasynyń qatysýshylary óz oilaryn aitty. Bul joba olarǵa óte qyzyqty jáne paidaly bolady dep úmittenedi. Osy jobanyń 2017 jylǵy aqpan aiynda bastaý alǵan birinshi maýsymynyń jeńimpazdary da óz áserlerimen bólisti. Jobanyń arqasynda olar ózderine jańa dos tapqandaryna rizashylyǵyn bildirdi. Sonymen qatar, qazaq tilinde sóilesýge jáne ony jaqsy túsinýge úirenip, al mektepte oqityn balalar «Qazaq tili» páninen baǵalary áldeqaida joǵarylaǵanyn tilge tiek etti.
«Qazaqsha sóileý ońai!» jobasy aiasyndaǵy kezdesýler, treningter 2017 jyldyń 1 qarashasynan, 2018 jylǵy 1 naýryzǵa deiin jalǵasady. Joba qorytyndysy boiynsha, 2018 jyldyń naýryz aiynda memlekettik tildi úirenýshiler arasynda saiys ótkizilip, jeńimpazdar marapattalatyn bolady.
.jpeg)