27 shildede belgili Túrkolog ǵalym Qarjaýbai Sartqojauly 77 jasynda Astana qalasynda ómirden ótti. Áleýmettik jelide ǵalymnyń eńbegi týraly, kózi tirisinde eńbeginiń baǵalanbaǵany haqynda oqyrmandar ózderiniń júrekjardy sózderin jazdy.
Aqyn Aqberen Elgezek óz paraqshasynda Qarjaýbai Sartqojaulynyń jasaǵan eńbegin eshteńeniń qadirin bilmeitin búgingi qoǵam túsinbeitinin jazdy. Degenmen, bilimdi, ultshyl urpaq oǵan sansyz alǵys aitatynyna senimdi.
"Basqa da marapattary bar shyǵar, bilmeimin ony. 2018 jyly ǵalymǵa "Qurmet" ordeni berilipti. Osydan 4 jyl buryn shyǵarǵan "Orhon eskertkishiniń tolyq atlasy" úshin memlekettik syilyq berse de jarasar edi. Memlekettiń de dańqy artar edi, ǵalymnyń da mereii ústem bolar edi. Qalai bolǵanda da Qarjaýbai Sartqojauly naǵyz ǵalym retinde de, qazaqtyń (odan ary asyryp aitsaq, ótirik emes), kúlli túrki juraǵatynyń arda oǵylany retinde de biik paryzyn oryndap ketken kisi", - dep jazdy aqyn.
Aitýynsha, ǵalymǵa biliktiń bergen bir bet maqtaý qaǵazy nemese syilyq emes, artynda qalatyn eńbeginen qundy qujat joq.
"Erteń kimniń qandai baiansyz, tarih jelimen ushyp ketetin juqa qujatqa qol qoiǵany emes, Qarjaýbaidyń "Orhon eskertkishiniń tolyq atlasy" atty 3 tomdyq ǵalamat eńbegi qalady tarihta. Jáne ol "sen kimsiń?" degen kez kelgen shúiirmurynǵa "men - uly túrkimin!" dep kórsetetin basty ulttyq qujattarymyzdyń biri bolady, - dep túiedi Aqberen Elgezek.
