Memlekettik satyp alý salasyna qoǵamdyq baqylaý júrgizý barysynda birneshe zańbuzýshylyq anyqtalyp, nátijesinde 40 hattama toltyryldy. Sonymen qatar 12 qylmystyq is qozǵaldy. Bul týraly «El namysy» arnaiy monitoringilik tobynyń múshesi Didar Smaǵulov málim etti, dep habarlaidy QazAqparat.
«Bizdiń qoǵamdyq uiym jumysyn bastaǵaly elimizde 13,5 myńnan astam azamattyń qatysýymen 500-den astam kezdesý ótti. Onyń ishinde 615 azamattyń máselesi jeke qaraldy. Ár azamattyń ótinishi men máselesine tiisti keńes berilip, quzyrly organdarǵa hat joldandy. Keibir jaittar sol jerde sheshimin taýyp jatty. Qazir qolymyzda bar málimetke sáikes, sheneýnikterge qatysty 145 ákimshilik jaýapqa tartý hattamasy toltyryldy. Salynǵan jalpy aiyppul kólemi 40 mln teńgeden asady. Zańbuzýshylyqqa kelsek, jaýapqa tartylǵan sheneýnikter nemese memlekettik qyzmetkerlerdiń jartysy negizgi jumysynan bólek, kásipkerlikpen ainalysqan», - dedi Didar Smaǵulov Ortalyq kommýnikatsiialar qyzmeti alańynda ótken baspasóz máslihatynda.
Monitoringilik top múshesiniń málimetinshe, qoǵamdyq baqylaý barysynda memlekettik satyp alý salasynda da zańbuzýshylyqtar anyqtaldy.
«Joǵaryda atalǵan 145 hattamanyń 40-y — memlekettik satyp alýǵa qatysty. Nátijesinde 16 mlrd teńgeden astam somaǵa memlekettik satyp alý baǵasyn qoldan ósirý jaity anyqtalyp, 12 qylmystyq is qozǵaldy. Mysaly, Aqtóbe qalasyndaǵy sport mektebi direktorynyń orynbasary negizgi jumysynan bólek jeke kásipker retinde memlekettik satyp alýmen ainalysqan. Sóitip, basqa sporttyq mektepterge qyzmetin usynyp kelgen. Nátijesinde aiyptynyń zańsyz tabysy tárkilenip, oǵan 428 myń teńge aiyppul salyndy. Sonymen qosa atalǵan azamat memlekettik satyp alýmen qatar, jetkizýshi rólin de atqarǵan», - deidi ol.
