2026 jyly 22 myńnan astam Almaty turǵyny memlekettik qyzmetterdi jeke menedjer arqyly alýdy tańdaǵan. «Jeke menedjer» qyzmeti halyqqa qyzmet kórsetý ortalyqtarynda, kóshpeli qyzmet kórsetý formatynda da qoljetimdi, dep habarlaidy ult.kz.
«Azamattarǵa arnalǵan úkimet» memlekettik korporatsiiasynyń Almaty qalalyq filialynyń málimetinshe, «Jeke menedjer» qyzmeti barlyq HQKO-larda, onyń ishinde mamandandyrylǵan ortalyqtarda kórsetiledi jáne basymdyqpen qyzmet alýǵa múmkindik beredi. Qyzmetti paidalaný úshin tirkeý ornyna júginip, kelisimshart jasaý qajet. Osydan keiin maman qujattardy rásimdeýdiń barlyq kezeńinde qyzmet alýshyǵa jeke kómek kórsetedi.
Qyzmet quny halyqqa qyzmet kórsetý ortalyqtarynda – 5 697 teńge, al mamandandyrylǵan HQKO-larda – 6 306 teńge.
HQKO-ǵa túrli sebeptermen kele almaityn azamattar úshin jeke menedjerdiń kóshpeli qyzmet kórsetý formaty qarastyrylǵan. Maman aldyn ala berilgen ótinim negizinde kelisilgen ýaqyt pen mekenjaiǵa barady. Kóshpeli qyzmet kórsetý quny – 7 447 teńge. Bul somaǵa uiymdastyrý jáne logistikalyq shyǵyndar kiredi.
Aita keteiik, kóshpeli format HQKO-nyń memlekettik qyzmetteri boiynsha usynylady. Alaida pasportty, jeke kýálikti, júrgizýshi kýáligin rásimdeý jáne kólik quraldaryn qaita tirkeý qyzmetteri bul formatta kórsetilmeidi.
Atalǵan qyzmet ásirese kishkentai balasy bar ata-analar, jumys kestesi tyǵyz azamattar jáne kásipkerler arasynda suranysqa ie. Degenmen ony kez kelgen ótinish berýshi óz qalaýymen paidalana alady. Bul format qyzmet alýdy aldyn ala josparlap, kútý ýaqytyn barynsha azaitýǵa múmkindik beredi.
Jeke menedjerdiń kóshpeli qyzmetine ótinim berý úshin Memlekettik korporatsiianyń resmi saityndaǵy «Qyzmetter» bólimine ótip, «Jeke menedjerdiń úiine barý» bólimin tańdaý qajet. Odan keiin «Ótinim qaldyrý» batyrmasyn basyp, qajetti málimetterdi toltyrý kerek.
Ótinim jiberilgen soń kórsetilgen telefon nómirine rastaý kody bar SMS-habarlama joldanady. Bir jumys kúni ishinde operator ótinish berýshimen bailanysyp, qyzmet kórsetý ýaqyty men ózge de málimetterdi naqtylaidy.
Sonymen qatar, 1414 biryńǵai bailanys ortalyǵy arqyly keńes alyp, ótinim qaldyrýǵa bolady. Keńes berilgennen keiin ótinish berýshige jeke menedjerdi úige shaqyrý úshin arnaiy silteme SMS arqyly jiberiledi.
Memlekettik korporatsiia azamattardyń qajettilikterin eskeretin jáne memleketpen ózara bailanysty jeńildetetin qyzmetterdi kezeń-kezeńimen engizýdi jalǵastyrady.
