Tbiliside Ortalyq Aziia, Kavkaz jáne Aziia-Tynyq muhity óńirinen kelgen 40-tan astam memlekettik qyzmetshi men sarapshylar «Memlekettik basqarýdaǵy jasandy intellekt: tiimdilik pen qoǵamdyq múdde arasyndaǵy tepe-teńdik» atty óńiraralyq seminarǵa qatysty. Is-shara 2026 jylǵy BUU Memlekettik qyzmet forýmy aiasynda uiymdastyryldy.
Qatysýshylar esep berý, ashyqtyq, inkliýzivtilik jáne sheshim qabyldaýda adamnyń jetekshi rólin saqtai otyryp, jasandy intellekt qalai memlekettik sektor tiimdiligin arttyra alatyndyǵy jaiyn talqylady.
Astana memlekettik qyzmet haby Basqarýshy komitetiniń tóraǵasy Alihan Baimenov jiyndy asha otyryp, adam men jasandy intellekt qatar ómir súretin dáýir memlekettik basqarýdy jetildirýde jańa múmkindikter beretindigin aitty. Sonymen qatar JI qarqyndy damýy ashyqtyq, derekterdi qorǵaý, adam quqyqtaryn saqtaý jáne etikalyq qaǵidattarǵa, sondai-aq, tiimdilik pen qoǵamdyq múdde arasyndaǵy tepe-teńdikti saqtaý joldaryn izdestirýge airyqsha nazar salýdy qajet etetindigine toqtaldy. Ol JI damýymen bailanysty múmkindikter men synaqtar ǵalamdyq sipatqa ie ekendigin jáne bul halyqaralyq yntymaqtastyq pen bilim almasýdy qajet etetindigin atap ótti.
Koreia Respýblikasy Ishki ister jáne qaýipsizdik ministrligine qarasty JI úkimeti ofisi direktory Djinhon Sim «JI-demokratiialyq úkimet» tujyrymdamasyn qatysýshylarǵa tanystyrdy. Onda jasandy intellekt tek tehnologiia retinde ǵana emes, azamattar ómir sapasyn arttyrýdyń, olardyń memlekettik basqarýǵa qatysý múmkindigin keńeitýdiń jáne neǵurlym ashyq, jaýapty ári adamǵa baǵdarlanǵan memleket qalyptastyrý quraly retinde qarastyrylǵan. Sondai-aq onyń inkliýzivti tsifrlyq transformatsiia tetigi ekendigi de aityldy.
Grýziia ádilet ministri orynbasary Tamar Zodelava, bastamaǵa qatysýshy elder atynan Bangladesh Halyq Respýblikasy Poshta, telekommýnikatsiialar jáne aqparattyq tehnologiialar ministri Fakir Mahbýb Anam, BUU Damý baǵdarlamasy Grýziiadaǵy Turaqty ókili Dýglas Ýebb qatysýshylarǵa jyly lebizderin bildirdi.
Is-shara barysynda Koreia Respýblikasy ishki ister men qaýipsizdik ministrligi, BUU ekonomikalyq jáne áleýmettik máseleler departamenti, Dúniejúzilik bank, Halyqaralyq elektr bailanysy odaǵy jáne Rýmyniianyń ulttyq informatika salasyndaǵy zertteýler institýty ókilderi óz tájiribelerimen bólisti. Olardyń prezentatsiialary JI basqarý, esep berý, tsifrly qoǵamdyq infraqurylym jáne memlekettik sektorda senimdi JI qoldanýdyń zamanaýi úrdisterine arnaldy.
Interaktivti pikir almasý kezinde qatysýshylar memlekettik sektorǵa JI engizýmen bailanysty basty jańa múmkindikter men synaqtar jaily oi bólisti. Olar institýtsionaldy daiarlyqqa, basqarý biliktiligin arttyrýǵa jáne qoǵamdyq senimdi nyǵaitý máselelerine basa nazar aýdardy.
12 memleket ókilderi JI engizý boiynsha óz elderindegi ulttyq tájiribelerin baiandap, tabystary men aldaǵy synaqtar, damý basymdylyqtaryn ortaǵa saldy.
Sonymen qatar, Alihan Baimenov Bangladesh Halyq Respýblikasy poshta, telekommýnikatsiialar jáne aqparattyq tehnologiialar ministri Fakir Mahbýb Anammen, Kambodja Koroldigi poshta jáne telekommýnikatsiialar ministri Vandet Cheamen, Filippin Respýblikasy aqparat jáne kommýnikatsiialyq tehnologiialar vitse-ministri Devid Almirolmen jáne Laos Halyq-Demokratiialyq Respýblikasy tehnologiialar jáne kommýnikatsiialar ministrligi bas direktory Tavisak Manodhammen ekijaqty kezdesýler ótkizdi. Sondai-aq ol BUU men Eýropa Keńesiniń ókilderimen júzdesti. Kelissózder barysynda taraptar tsifrlyq memlekettik basqarý salasynda yntymaqtastyqty odan ári damytý múmkindikterin talqylady.
Seminardy Astana memlekettik qyzmet haby, Qazaqstandaǵy BUUDB, Koreia Respýblikasy Ishki ister jáne qaýipsizdik ministrligi jáne Koreia Respýblikasy Ulttyq aqparattyq qoǵam agenttigi Grýziia Ádilet ministrligimen seriktestikte uiymdastyrdy.
