Elimizdiń barlyq mektepterin dástúrli bilim berý túrine kóshirý máselesi pysyqtalyp jatyr. Bul týraly Májilis depýtattarynyń resmi saýalyna QR Premer-Ministri Asqar Maminniń jaýabynda aitylǵan dep habarlaidy "Ult aqparat".
«Jańa oqý jylyna daiyndyq máselelerin jan-jaqty saraptaý, qoǵammen keńinen talqylaý qorytyndysynda, sonymen qatar árbir óńirdegi epidemiologiialyq ahýaldy eskere otyryp, Bilim jáne ǵylym ministrligi bilim berýdiń ár túrin (qashyqtan, shtatty jáne aralas) paidalaný týraly sheshim qabyldady. Búginde 3,4 mln bala (onyń ishinde 2 613 428 bala qashyqtan rejimde, 252 343 bala mektepterde shtatty bilim berý rejiminde, 546 776 bala kezekshi synyptarda) mektepte bilim alyp jatyr», - dedi Premer-Ministr.
Onyń atap ótýinshe, qashyqtan oqytý túrin túsindirý úshin ata-anaarmen qosymsha jumystar uiymdastyryldy. Atap aitqanda, 20 tamyz ben 17 qyrkúiekte jalpyrespýblikalyq ata-analar jinalysy, al 21 tamyzda jalpyrespýblikalyq synyp saǵat ótkizildi. Oqý protsesiniń qaýipsizdigin qamtamasyz etý úshin Densaýlyq saqtaý ministrligi Sanitarlyq ereje ázirlep bekitti. Erejede bilim berýdiń barlyq túrlerin eskere otyryp, bilim nysandaryna qoiylatyn talaptar qamtyldy. Qashyqtan oqytýdy engizýge óńirlerdiń basym bóligindegi mektepterde bala sanynyń kóptigi de túrtki boldy.
«Dúniejúzilik densaýlyq saqtaý uiymynyń málimetinshe, 12 jastaǵy jáne odan úlken jastaǵy balalar koronavirýs infektsiiasynyń taralýynda belsendi ról oinaidy. 2020 jyldyń 4 qazanyndaǵy jaǵdaiǵa sáikes, mektep oqýshylary arasynda koronavirýs infektsiiasyna shaldyǵýdyń 136 jaǵdaiy tirkeldi. Onyń ishinde 51 bala bastaýysh kezekti synyptarda, 85-i qashyqtan oqidy», - dedi Asqar Mamin.
Úkimet basshysynyń atap ótýinshe, búginde Germaniia, Resei, Ulybritaniia, Polsha, Frantsiia, AQSh, Ońtústik Koreia, Úndistan syndy elder koronavirýstyń jyldam taralýyna bailanysty dástúrli túrde bilim beretin mektepterdi karantinge jaýyp jatyr.
«Degenmen, Memleket basshysynyń tapsyrmasyna sáikes, qazirgi ýaqytta beiindi memlekettik organdar kezeń-kezeńmen jumsartý jáne dástúrli bilim berý túrine oralý máselesin zerdelep jatyr», - dedi Premer-Ministr.
