QR Aqparat jáne qoǵamdyq damý ministrligi memlekettik mekemelerdiń jumysyn BAQ arqyly baǵalaýdy kózdep otyr. Vedomstvo basshysy Asqar Ýmarov ministrliktiń keńeitilgen alqa májilisinde osyndai josparyn bólisti, dep habarlaidy QazAqparat.
«Jalpy, biyl da aldymyzda memlekettiń aqparattyq jumys sapasyn, qazaqstandyq BAQ-tyń básekege qabiletin odan ári damytý mindeti tur.
Memleket basshysynyń tapsyrmasyna sáikes, Úkimettiń aqparattyq jumysynyń deńgeiin aitarlyqtai kóterý qajet. Osyǵan bailanysty memlekettik mekemelerdiń jumysyn BAQ arqyly baǵalaý kózdelip otyr.
Biyl BAQ salasyn damytýdy BAQ jáne úkimettik emes uiym ókilderimen keńinen talqylamaqpyz. Bul jumys Aqparat salasyn damytýdyń 2023-2025 jyldarǵa arnalǵan Ulttyq jospar sheńberinde júrgiziledi», - dedi ministr.
Sondai-aq ol 2022-2023 jyldarǵa arnalǵan jýrnalisterdi oqytý jónindegi arnaiy jospary qolǵa alynatynyn atady. Aitýynsha, bul media mamandardyń biliktiligin damytýǵa, halyqtyń media jáne aqparattyq saýattylyǵyn qalyptastyrýǵa baǵyttalǵan.
«Qazaqstandyq internet-segmentin damytý biylǵy basym baǵyttardyń biri bolyp qala beredi. Qazaq tilindegi internet-resýrstardy, mýltimediialyq kontentti jáne onlain-platformalardy damytý qajet.
Turǵyndardyń media saýatyn arttyrý úshin úkimettik emes uiymdarmen birlesip media jáne aqparattyq saýattylyq aptasyn ótkizýdi josparladp otyrmyz.
Sonymen qatar, memlekettik telearnalardy jetildirýdiń jańa tásilderin ázirledik. Máselen, biyl «24 KZ» memlekettik telearnasy jańa formatta jumys isteýdi bastap otyr. Bul memlekettiń aqparat saiasatty tiimdi ári sapaly júzege asyrýǵa múmkindik beredi.
Oǵan qosa, memlekettik aqparattyq tapsyrys mehanizmderi jetildiriletin bolady», - dedi vedomstvo basshysy.
