Memlekettik materialdyq rezervter komitetiniń laýazymdy tulǵalary senip tapsyrylǵan múlikti ysyrap etkeni úshin sottaldy. Barlyǵy 21 adamǵa sot úkimi shyqty, dep habarlaidy "Ult aqparat".
QR Sybailas jemqorlyqqa qarsy is-qimyl agenttiginen málim etkendei, Memlekettik materialdyq rezervter komiteti (MMRK) «Rezerv» RMK filialdarynyń laýazymdy tulǵalaryna jáne azyq-túlik jetkizýshilerine qatysty (barlyǵy 22 adam) senip tapsyrylǵan múlikti asa iri mólsherde ysyrap etý faktileri boiynsha sotqa deiingi tergeý aiaqtaldy. Zalal somasy – 6,5 mlrd teńge.
1 aqpanda Almaty qalasy Almaly aýdandyq sotynyń úkimimen 21 adam bas bostandyǵynan aiyrý jáne 1-eýi bas bostandyǵyn shekteý jazalaryna sottaldy. Atap aitqanda:
- MMRK burynǵy tóraǵasy Imanaliev 8 jylǵa bas bostandyǵynan aiyrylyp, ony «Qurmet» ordeni, «Qazaqstan Konstitýtsiiasyna 10 jyl», «Astanaǵa 10 jyl», «Qazaqstan Respýblikasynyń Táýelsizdigine 20 jyl», «Qazaqstan Konstitýtsiiasyna 20 jyl» medaldarynan aiyrý týraly Prezidentke usynys engizildi (úi qamaýy úkim zańdy kúshine engenge deiin saqtaldy, úkim kúshine engennen keiin ol qamaýǵa alynady);
- MMRK Memlekettik satyp alý basqarmasynyń basshysy Maqashev 8 jylǵa bas bostandyǵynan aiyryldy;
– «Rezerv» – «Vysota» RMK filialynyń direktory Jaqanov pen bólim bastyǵy Rodin, sondai-aq «Rezerv» – «Signal» RMK filialynyń direktory Ǵaliev 8 jylǵa bas bostandyǵynan aiyryldy;
Atalǵan laýazymdy tulǵalar memlekettik qyzmette laýazym ielený quqyǵynan ómir boiyna aiyryldy.
– «Rezerv» – «Vysota» RMK filialy direktorynyń orynbasary Qusaiynovqa 2 jylǵa bas bostandyǵyn shekteý jazasy taǵaiyndaldy;
- azyq-túlik ónimderin jetkizýshiler Adamov, Drozdetskaia, Tartýmanov, Rashitov, A.Sabazov A., O.Sabazov, Abdýkarimov, Baqaev, Ǵabdýllin, Sadai, Isaev, B.Qojanov, D.Qojanov, Qanathan, Mustafinov, Ospanov 8 jylǵa bas bostandyǵynan aiyryldy.
