Tótenshe jaǵdai kezinde memlekettik qyzmetshilerdiń úiden jumys isteýi úshin qajetti tehnikalyq múmkindikter iske asyryldy, dep habarlaidy "Ult aqparat".
«QR Tsifrlyq damý, innovatsiialar jáne aeroǵarysh ónerkásibi ministrligi (TsDIAÓM) «UAT» AQ, Memlekettik tehnikalyq qyzmet jáne bailanys operatorlarymen birlesip, memlekettik qyzmetshilerdi ózderiniń jumys júielerine, iaǵni elektrondyq poshta men elektrondy qujat ainalymyna qashyqtan qosý úshin tiisti tehnikalyq sheshimdi iske asyrdy. Bul memlekettik qyzmetshilerge úide otyryp, elektrondy qujat ainalymy júiesine kelip túsken hat-habarmen jumys isteýge múmkindik beredi», - delingen atalǵan ministrlik habarlamasynda.
Atap aitqanda, bul shara Qazaqstan Prezidentiniń eldegi tótenshe jaǵdai kezinde memlekettik jáne kvazimemlekettik sektordaǵy barlyq qyzmetkerlerdiń 70 paiyzyn qashyqtan jumys isteýge kóshirý týraly tapsyrmasyn oryndaý maqsatynda qabyldandy.
Belgili bolǵandai, TsDIAÓM-niń 150-den astam qyzmetkeri qajetti aqparattyq júielerge, elektrondy poshta men qujat ainalymyna qosylý arqyly qashyqtan jumys isteýge múmkindik aldy. Sondai-aq, barlyq memlekettik organ qyzmetkerlerin óz organdarynyń aqparattyq júiesine qashyqtan qosý jumystary bastaldy.
«Jumys kezeń-kezeńmen júrgiziledi. Dál qazirgi ýaqytta Energetika, Ekologiia, Densaýlyq saqtaý, Eńbek jáne halyqty áleýmettik qorǵaý ministrlikteri aqparattyq júielerge qosylýda. Bul jumystyń nátijesinde taiaýda 30 000-nan astam memlekettik qyzmetshi úiden jumys isteýge múmkindik alady», - delingen taratylǵan málimette.
Bul múmkindikti usyný úshin bailanys operatorlary qashyqtan qosylý oryndarynda bailanys arnalarynyń parametrlerin eskere otyryp, qajetti infraqurylymdy daiyndady. Memlekettik qyzmetshilerdi qujat ainalymy júiesine qashyqtyqtan qosýdy uiymdastyrý úshin elektrondy qujat ainalymynyń biryńǵai júiesi platformasynan bultty tehnologiialarǵa kóshý júzege asyrylady.
