Men memlekettik qyzmette jumysqa kiremin dep sheshtim. Al memlekettik qyzmetkerge memlekettik tildi bilmegen uiat ekenin jaqsy túsinetinmin. Sol sebepti oqýymdy qazaq tilinde jalǵastyrdym. Bul týraly «Uly dalanyń ultaralyq tili» respýblikalyq forýmynda Nur-Sultan qalasy, Mamandandyrylǵan kúzet qyzmeti Basqarmasynyń politseii Armen Oganesian aitty, dep habarlaidy QazAqparat.
«Men 1993 jyly 6 shilde Ózbekstan Respýblikasy Jizaq oblysynda dúniege keldim. Ultym – armian. Ózbek dostarymmen aralasyp, ózbek tilin tolyq meńgerdim. Óz ana tilimde de jaqsy sóileimin. 14 jasqa tolǵanda, iaǵni 2007 jyly otbasymyzben Qyzylorda qalasyna kóship keldik. Orys mektebine qabyldandym. Synyptastarymnyń barlyǵy túrli ult ókilderi bolǵanmen, barlyǵy qazaqsha sóileitin. Solarǵa qarap qatty qyzyǵatynmyn. Qazaqstanda óspegendikten, memlekettik tilde men ǵana sóilemeitin edim. Sodan qatty namystanyp, qaitsem de qazaq tilin úirenemin dep sheshtim», - deidi Armen Oganesian.
Ol dostary men kórshileriniń arqasynda qazaq tilin jetik meńgergen. Mektep bitirgennen keiin Qyzylorda qalasyndaǵy zań kolledjine oqýǵa túsip, oqýyn qazaq tilinde jalǵastyrǵan.
«Men memlekettik qyzmette jumysqa kiremin dep sheshtim. Al memlekettik qyzmetkerge memlekettik tildi bilmegen uiat ekenin jaqsy túsinetinmin. Sol sebepti oqýymdy qazaq tilinde jalǵastyrdym. 2014 jyly Ishki ister organdaryna jumysqa ornalasý úshin Nur-Sultan qalasyna keldim. 2015 jyldan mamandandyrylǵan kúzet qyzmeti basqarmasynda jumys atqaryp kelemin. 2016 jyly jubaiym Dianamen tanystym, ekeýmiz bir salada qyzmet atqaramyz. 2018 jyly ekeýmiz otbasyn qurdyq. Men de qalyń qazaqtyń kúieý balasymyn. Medina esimdi qyzymyz bar. Áke-sheshemmen birge turamyz, ekeýi de zeinetker. Rýslan, Artýr esimdi eki aǵam bar. Ekeýide qazaq qyzdaryna úilengen. Qazaqstanǵa kóship kelgenimizge esh ókinbeimin. Qazaq halqyna bizdi qushaq jaiyp qarsy alǵany úshin alǵysym sheksiz», - deidi ol.
Ol Memleket basshysynyń qazaq tilin jaqsy biletin ózge ult ókilderin qoldaý týraly tapsyrmasy jaqsy júzege asyp jatqanyn aitty.
«Qazaqstan Prezidentiniń «Biz qazaq tilin jaqsy biletin ózge ult ókilderin qoldaýymyz kerek. Mundai azamattar qazaq tiliniń deńgeiin ultaralyq qatynas dárejesine kóterýge kómektesedi» degen tapsyrmasy óz dárejesinde oryndalyp jatqanyn jetkizgim keledi. Memlekettik tildi bilýdiń arqasynda jumysta jaqsy jetistikterge qol jetkizip kelemin. Sondai-aq qazaq tilin erkin meńgergen jastardyń tizimin jasap, olardy memlekettik qyzmettiń kadr rezervine alý qajet dep oilaimyn. Óitkeni tildi qurmetteý – sol eldi qurmetteý, memleketti qurmetteý», - deidi Armen Oganesian.
