Almatyda QR Memlekettik hatshysy Qyrymbek Kósherbaev Qazaqstannyń halyq ártisi, Memlekettik syilyqtyń eki dúrkin iegeri Doshan Joljaqsynovqa «Otan» ordenin saltanatty túrde tabys etti, dep habarlaidy QazAqparat.
Bul mártebeli marapat tanymal akterge ulttyq mádenietti, kinematografiiany jáne teatr ónerin damytýdaǵy airyqsha úlesi úshin Qazaqstan Respýblikasynyń Prezidenti Qasym-Jomart Toqaevtyń Jarlyǵymen berildi.
Sharaǵa QR Memlekettik hatshysy Qyrymbek Kósherbaev, Mádeniet jáne sport ministri Aqtoty Raiymqulova, kompozitor Tólegen Muhamedjanov, Almaty qalasy ákiminiń orynbasary Erjan Babaqumarov, mádeniet pen óner qairatkerleri qatysty.
«Qurmetti Doshan Qaliuly, Sizdiń san qyrly shyǵarmashylyǵyńyzdy elimizde bilmeitin adam joq shyǵar. Qarshadaiyńyzdan qazaq rýhaniiatyna qyzmet etip, eldiń esinde, jurttyń sanasynda máńgilikke saqtalatyn rólderdi somdadyńyz. Sondyqtan sizdiń teatr sahnasy men kino ekranynda shoqtyǵy biik keiipkerlerdi beinelegen akterlik sheberligińizge, naqyshymen án oryndaý ónerińizge tánti bolǵan ónersúier qaýym men qarapaiym kórermen óte kóp. Kinorejisser retinde «Birjan sal», «Qunanbai» sekildi kesek dúnielerdi túsirip, ulttyq kinematografiiamyzdyń damaýyna súbeli úles qostyńyz»,- dedi Qyrymbek Kósherbaev.
Saltanatty rásimde Memlekettik hatshy Doshan Joljaqsynovty 70 jasqa tolǵan belesine orai izgi tilegin jetkizip, Tuńǵysh Prezident - Elbasy N.Á.Nazarbaevtyń jáne Memleket basshysy Q.K.Toqaevtyń mereitoi iesine joldaǵan quttyqtaýyn oqyp berdi.
Doshan Qaliuly 1951 jyly 7 qazanda Shyǵys Qazaqstan oblysy Kúrshim aýdanynda dúniege kelgen.
1969 jyly Almaty memlekettik óner institýtyna (qazirgi Qazaq ulttyq konservatoriiasy) oqýǵa tústi.
1972 jyly Qazaq jastar men balalar teatrynda akter bolyp, keiin sol teatrda direktor qyzmetin atqardy.
Akter teatr sahnasynda jáne kinoda 200-den astam róldi somdaǵan.
Sonymen qatar halyq ánderi men qazirgi qazaq kompozitorlary ánderin sheber oryndaýshy retinde keńinen tanymal.
Doshan Joljaqsynov ulttyq kino óneriniń damýyna óz úlesin qosyp, «Gaýhartas», «Daladaǵy qýǵyn», «Altyn kúz», «Ompa», «Aq barystyń urpaqtary», «Kóshpendiler», «Birjan sal» jáne basqa filmderge túsken.
