Búgin Astanada ótken «Ádiletti jáne Progressivti Qazaqstannyń Halyqtyq Konstitýtsiiasy úshin!» Jalpyulttyq koalitsiiasynyń otyrysynda Memlekettik keńesshi Erlan Qarin aldaǵy referendýmnyń mańyzy men jańa Ata Zańnyń filosofiiasyna toqtaldy. Ol ulttyq birlik pen halyq senimi reformalardyń basty qozǵaýshy kúshi ekenin aitty.
Memlekettik keńesshi sózin el birligine qyzmet etýdiń qadir-qasietin aiqyndaýdan bastady.
«Osydan úsh jyl buryn Qazaqstan halqy Assambleiasynyń kezekti sessiiasynda Memleket basshysy: «El birligin nyǵaitý úshin qyzmet etý – eń jaýapty ári saýapty is», – degen edi. Prezidenttiń osy sózin túrli jiyndarda únemi qaitalap júremin. Birlikte jáne birlikke qyzmet etý – jaqsylyqtyń eń abzaly. Óitkeni jumylyp istegen istiń paidasy da, nátijesi de orasan bolady», – dedi Erlan Qarin.
Memlekettik keńesshi Konstitýtsiialyq reformanyń uzaq ýaqyt boiy jan-jaqty talqylanǵanyn, bul qujattyń búkilhalyqtyq sipatyn erekshe atap ótti.
«7 aidan astam ýaqyt boiy daiyndalyp, pysyqtalǵan Konstitýtsiialyq reforma – qoǵam birligi men halyq yntymaǵynyń aiǵaǵy. Bul Jańa Ata Zańdy ázirleýge myńdaǵan adam qatysty. Sondyqtan Jańa Konstitýtsiia elimiz úshin berekeli qujat bolady dep senemin», – dedi ol.
Buǵan qosa, Erlan Qarin óńirlerdegi kezdesýlerge toqtalyp, halyqtyń reformalarǵa degen yqylasy men Memleket basshysyna degen senimin atap ótti.
«Azamattarymyzdyń basym bóligi Jańa Konstitýtsiiany qoldap otyr. Bul qoldaýdyń ózeginde – Memleket basshysyna jáne onyń bastamasymen júzege asyrylyp jatqan ózgeristerge degen úmit bar. Eger halyq bilikke senbese, reformalardy bastaý da qiyn bolar edi. Tek halyqtyń qoldaýy bizge osyndai júieli ózgeristerdi jasaýǵa kúsh berip otyr», – dedi Erlan Qarin.
Sonymen qatar, Memlekettik keńesshi qoǵamdaǵy pikir alýandyǵyna toqtalyp, reformany synaýshylarǵa qatysty óz oiyn bildirdi.
«Búginde elimizdiń ár azamaty óz oiyn, óz pikirin erkin aitýǵa quqyly. Sondyqtan, búginde bolyp jatqan ózgeristerdi bireýler qoldaidy, bireýler syn aitady, bireýler suraq qoiady. Bul – biz qurýǵa umtylǵan ashyq qoǵamnyń belgisi. Biraq sol syn aityp júrgender ulttyq biregeilikke, aýmaqtyq tutastyqqa nemese dástúrli qundylyqtardy qorǵaýǵa baǵyttalǵan normalarǵa qarsy bolǵandaryn túsine me?!», – dedi ol.
Erlan Qarinniń aitýynsha, osyndai taǵdyr sheshti sátte tutas qoǵamdy artqa tartý – durys emes. Ol Jańa Konstitýtsiianyń basty missiiasy – saiasi kózqarasyna qaramastan, árbir qazaqstandyqtyń quqyǵyn teń qorǵaý ekenin túsindirdi.
«Túptiń túbinde jańa Konstitýtsiia ony qoldaǵandardy da, kúmán keltirgenderdi de báribir birdei qorǵap, teń kepildik beredi. Erteń bir azamatymyz álemniń bir shetinde qiyn jaǵdaiǵa ushyrasa, memleket ony jalǵyz qaldyrmaidy. «Ár qazaq – jalǵyzym» degen ulttyq uranymyz endi «Ár azamat – basty qundylyq» degen konstitýtsiialyq qaǵidatqa ainaldy», – dep naqtylady Memleket keńesshi.
Sóz sońynda Erlan Qarin referendým ótkiziletin kúndi Jańarý kúni dep atap, onyń tarihi mańyzyna nazar aýdardy.
«15 naýryz – bul tek referendým kúni emes, bul – Jańarý kúni. Eger azamattarymyz qoldasa, biz jańa dáýirge aiaq basamyz. Adamdar turǵyn úiden zańsyz shyǵarylmaidy, jeke derekter qorǵalady, egemendiktiń iesi halyq bolyp tanylady. Jańa Konstitýtsiia úlken jańashyldyqtardyń, berekeli isterdiń bastaýy bolsyn!», – dep túiindedi Memlekettik keńesshi.
