Áielderdiń memleketti basqarý isine barynsha belsendi atsalysýyn júieli túrde iske asyryp kelemiz. Bul týraly Ulttyq qoǵamdyq senim keńesiniń tórtinshi otyrysynda Prezident Qasym-Jomart Toqaev málim etti, dep habarlaidy QazAqparat.
«Bizdiń turaqty túrde kezdesip turýymyz jaqsy dástúrge ainaldy. Kópshiligińizben el damýynyń ártúrli máselelerin birge talqyladyq. Búgingi jiyn ortaq jumystyń birqatar qoryntyndylaryn aiqyndaýǵa arnalyp otyr. Negizgi jumystar keńes otyrystarynyń aralyǵynda júrgiziledi. Sebebi tek bastamany kóterip qoia salý jetkilikti emes. Zań jobalaryn ázirleý, ózara mámlege kelý joldaryn izdeý kóp ýaqyt pen tabandy eńbekti talap etedi», - dedi Prezident.
Osy oraida, Memleket basshysy keńes músheleri aitqan ideialarmen jáne usynystarmen muqiiat tanysyp shyqqanyn aitty.
«Biyl mamyr aiynda «Sailaý týraly» Zańǵa Ulttyq keńes bastamasymen engizilgen ózgeristerge qol qoiǵanymdy bilesizder. Soǵan sáikes, partiialardyń sailaýaldy tizimine áielder men jastar úshin 30 paiyzdyq kvata engizý qajettigi zańdyq turǵydan rásimdeldi. Biz áielderge qoldaý kórsetip, olardyń memleketti basqarý isine barynsha belsendi atsalysýyn júieli túrde iske asyryp kelemiz. Statistika sáikes barlyq memlekettik ákimshilik qyzmetshilerdiń 55 paiyzdan astamy áielder. Sondai-aq, Parlament pen máslihat depýtattarynyń 22 paiyzy, sýdialar korpýsynyń 47 paiyzy áielderdiń enshisinde. Oǵan qosa, biyl elimizdiń tarihynda tuńǵysh ret áiel adam oblys basshysy boldy. Sarapshylardyń baǵalaýynsha, Qazaqstan - memlekettik basqarý júiesindegi jáne biliktiń ókildi organdaryndaǵy áielderdiń úlesi boiynsha postkeńestik elder arasynda kósh bastap turǵan memleketterdiń biri», - dedi Qasym-Jomart Toqaev.
