Prezidenttiń tabandy pozitsiiasy, ótkir sheshimderi jáne Qazaqstan halqyna qaita-qaita jasaǵan úndeýleri qańtar oqiǵasy kezinde qaskóilerdiń aram oilaryn iske asyrýǵa múmkindik bermedi. Májilistiń jalpy otyrysynda depýtat Edil Jańbyrshin osyndai paiym aitty, dep habarlaidy QazAqparat.
«Ókinishke qarai, Almaty oblysy, Almaty, Taraz, jáne basqa da qalalarda beibit sherýler arandatýshylardyń kesirinen jappai buzaqylyq pen qantógiske ulasty. Qanshama beibit azamattar men qarýsyz quqyq qorǵaý qyzmetkerleri jaralandy, qaza tapty. Memlekettik jáne kásipkerlik nysandar qirady. Bul ádeii uiymdastyrylǵan áreket dep esepteimin. Óitkeni Prezident Toqaevtyń iske asyra bastaǵan saiasi jáne ekonomikalyq reformalaryna qarsy toptar osyndai qatygezdikke bardy. Iá, elde qordalanyp qalǵan áleýmettik-ekonomikalyq máseleler bar. Ol jasyryn emes. Osy jaǵdaidy utymdy paidalanǵysy kelgen bilikqumar aramzalar halyqtyń atyn jamylyp, ózderiniń aram piǵyldaryn iske asyrǵylary keldi. Tike aitqanda olardyń oilary memlekette tóńkeris jasaý edi», - dedi Májilis depýtaty.
Edil Jańbyrshin osyndai syn saǵatta Prezident búlikti uiymdastyrýshylar kútpegen qadamǵa barǵanyn aitady.
«Qantógisti uiymdastyrýshylar Memleket basshysy búkil óńirler kóterilgende elden ketip qalady nemese óz orynyn bosatady, bilikti ońai bere salady dep oilaǵan bolýy kerek. Mundai jaǵdailar búlik shyqqan memleketterde bolǵanyn jaqsy bilemiz. Shynynda da elde aýyr jaǵdai oryn aldy. Bilik qyl ústinde turdy. Alaida, Qasym-Jomart Kemelulynyń tabandy pozitsiiasy, ótkir sheshimderi jáne Qazaqstan halqyna qaita-qaita jasaǵan úndeýleri kóńilge senim uialatyp, qaskóilerdiń aram oilaryn iske asyrýǵa múmkindik bermedi. Memleketti haosqa jibermegen basshyny kózi ashyq, kóńili oiaý adam baǵalai bilýi kerek», - dedi depýtat.
