Memlekettik qoldaý alǵan biznes sýbektilerine monitoring júrgizýdiń biryńǵai qaǵidasy ázirlenedi. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Ulttyq ekonomika ministrligi Memleket basshysynyń árbir tapsyrmasyn is júzinde oryndaý sharalaryn ázirledi. Osy jyldyń mamyr aiynyń sońyna deiin salyq, biýdjet saiasatyn jetildirý boiynsha usynystar engiziledi. Usynystardy ázirleý úshin «Atameken» UKP jáne salyq zańnamasyn jetildirý jónindegi sarapshylar qaýymdastyǵynyń qatysýymen jumys toby qurylady. Nátijesinde shikizattyq emes sektorǵa negizdelgen ekonomikanyń jańa qurylymyn qalyptastyrý úshin salyqtyq sharalar toptamasy daiyndalady. Memlekettik qarjynyń teńgerimdiligin qamtamasyz etý, olardyń ornyqtylyǵyn, sondai-aq qabyldanatyn biýdjettik sheshimderdiń tiimdiligin arttyrý boiynsha sharalardy kózdeitin 2030 jylǵa deiingi jańa biýdjet saiasaty tujyrymdamasynyń jobasy qalyptastyrylady», - dedi ministr.
Sonymen qatar ol shaǵyn jáne orta biznesti qoldaý jóninde sharalardy ázirleý úshin de «Atameken» UKP jáne sarapshylar qaýymdastyǵynyń qatysýymen jumys toby qurylatyndyǵyn aitty.
«Bir ai ishinde ázirlengen usynystar ekonomikalyq ósimdi qalpyna keltirý jónindegi memlekettik komissiianyń qaraýyna engiziledi. Memlekettik qoldaýdyń tiimdiligin arttyrý maqsatynda memlekettik qoldaý alǵan biznes sýbektileriniń árqaisysy boiynsha monitoringtiń biryńǵai qaǵidasy ázirlenedi. Sondai-aq sýbektilerdiń kóp ólshemdi jáne serpindi monitoring júiesi qalyptastyrylady. Bul memlekettik qoldaý sharalarynyńekonomikalyq jáne áleýmettik qaitarymyn baǵalaýǵa múmkindik beredi», - dedi Áset Erǵaliev.
