Jazýshy, Halyqaralyq «Alash» syilyǵynyń laýreaty Dáýren Qýat Memleket basshysy Qasym-Jomart Toqaevtyń málimdemesine orai pikir bildirdi, dep habarlaidy QazAqparat.
«Memleket basshysynyń málimdemesi – naǵyz kerek málimdeme boldy. Tótenshe jaǵdai jariialanǵaly kómek, járdem suraityn adamdar sany kóbeiip ketti. Meditsina qyzmetkerleriniń densaýlyǵyna, jeke bastarynyń qaýipsizdigine qatysty máseleler týyndady. Kásipkerler kásibinen qaǵylyp qalmaýy kerek, sondai-aq alyp otyrǵan jalaqylary tómendep qalǵan nemese kúnkóris kózinen aiyrylyp qalǵan azamattar bar. Memleket basshysy Qasym-Jomart Toqaev keshe osy máselelerdiń bárine toqtalyp, qajetti kómek kórsetiletini týraly málimdedi», - deidi jazýshy Dáýren Qýat.
Ol Memleket basshysy biliktiń halyqpen birge ekendigin, halyqty eshqandai qiyn jaǵdaiǵa qaldyrmaityny týraly aitqanyna toqtalyp ótti.
«Bul – bizdiń memleketimizdiń áleýetin, mol qarajatymyz bar ekenin, osyndai qiyn jaǵdaida memleket tarapynan kómek bolatynyn kórsetedi. Prezidenttiń «Endi memleketke halyq kómektesýi kerek» degen sózi kóńilimnen shyǵady. Bul sózdi durys túsinýimiz kerek. Olardyń qoiyp otyrǵan talaby – virýstyń taralyp ketpeýi úshin úiden shyqpai otyrý. Bul adamnyń quqyǵyn, jeke basynyń múddesin shekteitin talap emes. Bul jeke basymyzdyń qaýipsizdigin saqtaý úshin jasalǵan talap», - deidi Dáýren Qýat.
Sondai-aq, ol beriletin áleýmettik tólemderge toqtalyp ótti. Onyń sózinshe, Prezident 42 500 teńge beriletini týraly jai ǵana aita salmai, ondai kómektiń qansha adamdy qamtitynyna nazar aýdardy. Sonymen qatar, Dáýren Qýattyń paiymynsha, bul Úkimettiń osyǵan qatysty sanaq, saraptama júrgizgenin bildiredi. «Keshegi Prezidenttiń málimdemesinen keiin kóńilimiz ornyǵyp qaldy. Ainalańdaǵy adamdardyń alańdamai, bolashaqqa senip otyrǵany da jaqsy ǵoi», - deidi ol.
«Qansha qarjy bólindi, ony qansha adam aldy – Úkimet osynyń bárin ashyq túrde kórsetip otyrsa jaqsy bolar edi. Mysaly, Aqmola oblysyna qansha janar-jaǵarmai bólingeni ashyq kórsetilse. Sonymen qatar, telearnalar azyq-túliktiń adamdarǵa tegin jetkizilgeni týraly videosiýjetter kórsetip tursa durys bolar edi», - deidi Dáýren Qýat.
Aita keteiik, keshe Prezident Qasym-Jomart Toqaev respýblikalyq telearnalar efirinen málimdeme jasaǵan bolatyn.
