Búgin Úkimet otyrysynda Respýblikalyq biýdjetti jáne Ulttyq qordan kepildendirilgen transfertti naqtylaý týraly zań jobalary maquldandy, dep habarlaidy QazAqparat.
«Búgin álemdik saiasi-ekonomikalyq jaǵdaidy eskere otyryp, osy jylǵa arnalǵan makroekonomikalyq kórsetkishterdiń naqtylanǵan boljamyn qaradyq. Memleket óziniń áleýmettik mindettemelerin tolyq kólemde jáne ýaqytyly oryndaidy. Sondai-aq qazirgi jaǵdaida ekonomikanyń sapaly jáne ornyqty damýyn qamtamasyz etedi. Respýblikalyq biýdjet jobasy birinshi kezekte osyǵan baǵyttalyp otyr. Biýdjet teńgerimdiligin qamtamasyz etý úshin Ulttyq qordan túsetin kepildendirilgen transfert mólsherine túzetý engiziletin bolady», - dedi Premer-Ministr Álihan Smaiylov.
Onyń atap ótýinshe, qosymsha shyǵystar Memleket basshysy Qasym-Jomart Toqaevtyń qańtar aiyndaǵy, sondai-aq Úkimettiń keńeitilgen otyrysynda jáne Qazaqstan halqyna Joldaýynda bergen tapsyrmalaryn iske asyrýǵa jumsalady. Sonymen birge osyǵan deiin qabyldanǵan shuǵyl mindettemelerdi oryndaýǵa baǵyttalady.
«Qarajatty qańtar oqiǵasynan keiin memlekettik múlik pen qalalardyń infraqurylymyn qalpyna keltirýge, qarjy-ekonomikalyq turaqtylyqty qamtamasyz etýge jáne halyqty, biznes pen ekonomikanyń naqty sektoryn qoldaýǵa jumsaý josparlanýda» dedi - Álihan Smaiylov.
Osydan keiin Úkimet músheleri Naqtylanǵan áleýmettik-ekonomikalyq damý boljamy men biylǵy jylǵy respýblikalyq biýdjetti naqtylaý boiynsha tásilderdi maquldady. Biylǵy jylǵy respýblikalyq biýdjetti naqtylaý týraly jáne Ulttyq qordan kepildendirilgen transfertti naqtylaý týraly zań jobalaryna qoldap daýys berdi.
«Ulttyq ekonomika jáne Qarjy ministrlikteri Premer-Ministr Keńsesimen birlesip, zań jobasy men Áleýmettik-ekonomikalyq damý boljamyn Parlamentke engizýdi qamtamasyz etsin», - dedi Álihan Smaiylov.
