Kámeletke tolmaǵandarǵa qatysty jynystyq qylmys jasaǵany úshin sottalǵan adamdar týraly málimetterdi áleýmettik jelide jariialaǵan qazaqstandyqqa qatysty politsiiaǵa aryz túsip, sotqa júgingen. Bul týraly Álimjan Esqaraev málimdedi, dep habarlaidy ult.kz.
Esqaraev buǵan deiin kámeletke tolmaǵandardyń jynystyq tiispeýshiligine qarsy qylmys jasaǵany úshin sottalǵan adamdar jónindegi ashyq aqparattardy jinai bastaǵan. Ol memlekettik resýrstarda jariialanǵan fotosýretter men turǵylyqty qalasy týraly derekterdi biriktirip, óńirler boiynsha tizimder jasaǵan.
Onyń áleýmettik jelidegi jazbalarynda Aqtaý, Oral, Taldyqorǵan, Astana jáne basqa qalalarda turatyn adamdar týraly málimetter bar.
Alaida mundai jariialanymdardan keiin tizimge engen adamdar men olardyń týystary Esqaraevpen bailanysyp, aqparat pen fotosýretterdi óshirýdi talap etken. Onyń aitýynsha, keibiri politsiiaǵa shaǵym túsirip, sotqa da júgingen.
Shaǵymdanýshylardyń paiymynsha, atalǵan adamdar jazasyn ótep qoiǵan. Sondyqtan olardyń sýretteri men jeke derekteriniń qaitadan kópshilikke jariialanýy qosymsha qysymǵa ákelýi múmkin.
Esqaraev bolsa, óz áreketin memlekettik organdar burynnan ashyq jariialaǵan aqparatty jinaqtaý dep túsindiredi. Ol tizimdegi adamdardy qýdalaýǵa, qorqytýǵa nemese jazalaýǵa shaqyrmaitynyn atap ótti.
«Men eshkimdi qýdalaýǵa, qorqytýǵa nemese óz betinshe jazalaýǵa shaqyrmaimyn. Men tek memlekettik organ buǵan deiin jariialaǵan aqparatty jinaqtap otyrmyn. Fotosýretter QR IIM Qylmystyq-atqarý júiesi komitetiniń resmi saitynan alynǵan», – dedi ol.
Esqaraevtyń sózinshe, jariialanymdardan keiin kerisinshe, ózi de tizimdegi adamdardyń týystarynan qaýip-qater týraly habarlamalar alǵan.
Ol is sotqa jetse, sot protsesi aiasynda jariialaýǵa ruqsat etilgen materialdardy oqyrman nazaryna usynatynyn málimdedi.
