Qazaqstan Respýblikasynyń Úkimeti respýblikalyq menshiktiń keibir máseleleri týraly qaýly qabyldady, dep habarlaidy "Ult aqparat" Premer-Ministrdiń resmi saityna silteme jasap.
«Kóliktik servis ortalyǵy» AQ (KSO) aktsiialary paketiniń 100%-yn syiǵa tartý sharty boiynsha respýblikalyq menshikke berý týraly «Temir Triýmf» JShS-niń usynysy qabyldansyn» delingen Qaýly mátininde.
«KSO» AQ Qazaqstandaǵy 400-den astam temirjol kirme joldarynyń teńgerim ustaýshysy ekenin atap ótken jón.
Sondai-aq, syiǵa tartý sharty boiynsha «Integrity Solutions» JShS aqparattyq-kommýnikatsiialyq salada qyzmet kórsetetin «Soft Art» JShS jarǵylyq kapitalyndaǵy qatysý úlesiniń 50%-yn respýblikalyq menshikke beredi.
«Bridge capital investments limited» jeke kompaniiasy memleketke taý-ken jáne óńdeý ónerkásibi salalarynda jumys isteitin «Akmolit» JShS, «Marhit» JShS, «Topaz-NS» JShS jarǵylyq kapitaldaryndaǵy qatysý úlesteriniń 100%-yn beredi.
«KSO» AQ aktsiialary jáne atalǵan seriktestikterdiń jarǵylyq kapitaldaryndaǵy qatysý úlesteri «Samuryq-Qazyna» ulttyq ál-aýqat qory» aktsionerlik qoǵamynyń ornalastyrylatyn aktsiialaryna tóleýge beriledi.
Qaýly qol qoiylǵan kúnnen bastap qoldanysqa engiziledi.
Eske sala keteiik, «Qazaqtelekomnyń» 28,8 paiyz aktsiiasy memleketke qaitarylatyny habarlanǵan.
