Koronavirýs daǵdarysyn eńserýde qandai qadamdardy iske asyrǵan jón? Bul suraqqa QR Prezidentiniń keńesshisi Sýma Chakrabarti jaýap berýge tyrysty, dep habarlaidy QazAqparat.
«Osy daǵdarysty jaqsy eńsergen elderge qarasaq, bul rette eki fazany túsiný kerek. Birinshi faza – daǵdarysty basqarý. Meniń oiymsha, ólim-jitim jaǵdaiyna qarasaq, Shyǵys Aziia osy baǵytta jaqsy qadamdar jasady. Al vaktsinalaý deńgeiine nazar aýdarsaq, AQSh pen Izrail, sondai-aq Ulybritaniia táýir kórsetkishterdi baiqatty. Sondyqtan keibir elder birinshi fazaǵa qaraǵanda, ekinshi fazada (vaktsinalaýda) ózin jaqsy kórsete aldy. Bul óz kezeginde memlekettik josparlaý júiesi fýntsiiasynyń nátijesi bolyp otyr», - dedi Sýma Chakrabarti «Astana FINANCE DAYS 2021 konferentsiiasy aiasyndaǵy sessiia jumysynda.
Onyń aitýynsha, bul máselede birneshe mańyzdy qadamdar bar. Birinshiden, jumys oryndary men eńbek naryǵyn saqtai otyryp, ekonomikany qalpyna keltirý. Osy oraida shaǵyn jáne orta biznes kásiporyndary boiynsha kóptegen jumys oryndary bosap qaldy.
«Bul jaǵdailarda memleket belsendi qadamdar jasaýy tiis. Memlekettik apparat reformalary daǵdarys men pandemiiaǵa qatysty keiinge shegerildi. Táýekelder Qazaqstanmen qatar, basqa da elderge de qatysty. Memleket ózine kóshbasshylyq róldi ala berse, memleket ekonomikany basqarýdy jalǵastyra berse, adamdar osyǵan úirenip alýy múmkin. Iaǵni naryqtyń ekonomikany basqarýy nazardan tys qalýy yqtimal», - dedi Sýma Chakrabarti.
Osy oraida ol naryq ekonomikany basqarýy kerek ekenin atap ótti.
«QR Prezidentiniń keńesshisi retindegi meniń rólime toqtalsam, ekonomika men sharýashylyqtyń naryqqa baǵyttalǵan modelin qurýǵa ekpin qoiylyp otyr. Sondyqtan investitsiialyq klimatty jaqsartý, barsha reformalardy jalǵastyrý turǵysynda memleket ózin reformalaýy tiis ekenin aitýymyz kerek. Bizdiń josparlaǵan damý protsesi ornyqty bolýy tiis, iaǵni qazba shikizatyn paidalanýdy qysqartý mańyzdy. Energiia tasymaldaýshylardyń qazba kózderine ǵana senim artý dástúri ótken kúnniń enshisinde. Otyn-energetika teńgeriminiń qurylymyn ózgertý kerek», - dedi sarapshy.
