Qazaqstannyń ekstrakorporaldy uryqtandyrý tehnologiiasy AQSh, Eýropa tehnologiiasynan kem emes. Mundai pikirdi QR Prezidenti janyndaǵy Qazaqstannyń strategiialyq zertteýler institýty direktorynyń keńesshisi Mádina Nurǵalieva Aqparat jáne qoǵamdyq damý ministrligi uiymdastyrǵan QR Prezidenti Joldaýy aiasyndaǵy áleýmettik basymdyqtardy talqylaýǵa arnalǵan dóńgelek ústel otyrysynda aitty, dep habarlaidy QazAqparat.
«Prezident Joldaýy keshe báriniń aýzynda júrgeni sózsiz. Alda áli talai kópten jaittar men detaldaryn tereńirek talqylaityn bolamyz. Búgingi baǵdar Joldaýda aitylǵan áleýmettik basymdyqtar bolǵandyqtan menińshe, eń mańyzdy sanalatyn otbasylyq saiasat, balalar, áleýmettik-demografiialyq máseleler jaiyna toqtalǵym keledi. Áleýmettik jelilerdegi pikirlerdi sholyp otyryp, 2021 jyldan ekstrakorporaldy uryqtandyrý baǵdarlamasy boiynsha kvota sanyn arttyrýǵa qatysty bastamanyń barynsha qoldaýǵa ie bolǵandyǵyn baiqap qaldym», - dedi ol.
Onyń aitýynsha, Eýropalyq adam reprodýktsiiasy qaýymdastyǵynyń deregine sáikes, 1 mln turǵynǵa ekstrakorporaldy uryqtandyrý baǵdarlamasy 1-1,5 myń kvota qoldanylýy tiis. Qazaqstanda bul kórsetkish 1 myń kvotaǵa teń.
«Qazaqstan bul taqyryppen 20 jyl boiy ainalysyp keledi jáne bizde birinshi ekstrakorporaldy uryqtandyrý 2010 jyly jasaldy. Sol kezde memleket ekstrakorporaldy uryqtandyrý boiynsha 100 kvotaǵa ǵana aqsha bólgen edi. Osy aralyqta elimizde kóptegen sábi dúniege kelip, kóptegen otbasy óziniń mártebesin nyǵaitty», - dedi ol.
Ol bul baǵyttaǵy qazaqstandyq tehnologiianyń Eýropa elderi, AQSh, Ońtústik-Shyǵys Aziia elderi tehnologiiasynan kem emestigin basa aitty.
«20 jyldyń ishinde bizge 51 elden bedeýligi bar patsientter kelip emdeldi. 18 mln halqymyzǵa EKO baǵdarlamasynyń munan da kóp kvotasy qajet. Memleket basshysynyń bul kórsetkishti arttyrý týraly keshegi tapsyrmasy qazaqstandyq otbasylar úshin máseleniń qanshalyqty mańyzdy ekendigin kórsetip otyr», - dedi Mádina Nurǵalieva.
