Almatyda memleketten jalǵa berilgen áleýmettik páterlerdi zańsyz paidalanǵan azamattarǵa qatysty tekseris kúsheidi. Jyl basynan beri qaladaǵy 3125 páter tekserilip, 172 zań buzýshylyq anyqtalǵan, dep habarlaidy ult.kz.
Kommýnaldyq infraqurylymdy damytý basqarmasy men Turǵyn úi inspektsiiasynyń mamandary Naýryzbai, Alataý, Medeý jáne Túrksib aýdandaryndaǵy kommýnaldyq turǵyn úi qoryna monitoring júrgizgen.
Tekserý barysynda memlekettik turǵyn úilerdi úshinshi tulǵalarǵa zańsyz berý, qosalqy jalǵa shyǵarý, jaldaý shartynda kórsetilmegen adamdardy turǵyzý jáne jaldaý aqysyn tóleý mindettemelerin oryndamaý faktileri anyqtaldy.
Anyqtalǵan 172 jaǵdaidyń 114-i boiynsha páterler bosatyldy. Qalǵan 58 jaǵdaiǵa qatysty sotqa deiingi talaptar joldanǵan.
Qala ákimdiginiń málimetinshe, bosatylǵan páterlerde jóndeý jáne qalpyna keltirý jumystary júrgizilip jatyr. Jumystar aiaqtalǵannan keiin baspanalar turǵyn úi kezeginde turǵan áleýmettik osal sanattaǵy azamattarǵa qaita beriledi.
Ákimdik memleket bergen jalǵa beriletin turǵyn úidi úshinshi tulǵalarǵa berýge bolmaitynyn eskertti. Mundai áreket jaldaý shartyn buzýǵa negiz bolady.
«Turǵyn úi qatynastary týraly» zańnyń 24-baby 3-tarmaǵyna sáikes, memleket tarapynan berilgen turǵyn úidi azamat ózge adamǵa jalǵa berýge nemese ýaqytsha turǵyndardy ornalastyrýǵa quqyly emes.
Buǵan deiin Almatyda turǵyn úi kezeginde turǵan azamattardy pátermen qamtý qarqyny týraly jazǵan bolatynbyz.
