Qasym-Jomart Toqaev Marlen Mamatalievke iltipat bildirip, onyń Qazaqstanǵa alǵashqy resmi sapary ekijaqty qarym-qatynasty nyǵaitý turǵysynan airyqsha mánge ie ekenin atap ótti, dep habarlaidy ult.kz.
– Elimizge arnaiy kelgenińizge qýanyshtymyz. Saparyńyz óte mańyzdy. Bul eki el arasyndaǵy yntymaqtastyqqa tyń serpin beredi dep senemin. Elderimiz arasynda eshqandai túitkil nemese túsinispeýshilik joq. «Qazaq-qyrǵyz – bir týǵan» degen sóz bar. Bir keńistikte baýyrlas, tatý bolyp, aramyzdaǵy qarym-qatynasty nyǵaita beremiz. Qyrǵyz Respýblikasynyń ekonomikasy joǵary qarqynmen damyp keledi. Biz bul oń úrdisti qoldaimyz. Qyrǵyz Respýblikasy Birikken Ulttar Uiymy Qaýipsizdik Keńesiniń turaqty emes múshesi bolyp sailandy. Muny Qyrǵyzstan men Ortalyq Aziia elderi úshin tarihi oqiǵa dep aitýǵa bolady. Osyǵan orai Prezident Sadyr Nýrgojoevich Japarovqa quttyqtaý hat joldadym, – dedi Prezident.
Marlen Mamataliev Qasym-Jomart Toqaevqa kezdesý úshin alǵys aityp, Prezident Sadyr Japarovtyń ystyq yqylasyn jetkizdi.
– Qyrǵyz tarapy Sizdiń basshylyǵyńyzben iske asyrylǵan aýqymdy konstitýtsiialyq ózgeristerdi qoldaidy. Men muny senimdi túrde aita alamyn. Bul ádiletti ári ozyq Qazaqstandy qurýǵa berik negiz qalaidy. Sizge jáne baýyrlas Qazaqstan halqyna beibitshilik, baq-bereke tileimin. Qolǵa alǵan reformalardy tabysty júzege asyrýlaryńyzǵa tilektespin, – dedi Jogorký Kenesh Tóraǵasy.
Kezdesý barysynda parlamentaralyq bailanystardy damytý jáne joǵary deńgeide qol jetkizilgen ekijaqty ýaǵdalastyqtardy zańnamalyq turǵydan tiimdi qamtamasyz etý máseleleri talqylandy.
Eki elde júrgizilip jatqan júieli áleýmettik-ekonomikalyq reformalar jóninde mazmundy ári egjei-tegjeili áńgime órbidi.
Prezident pen Jogorký Kenesh Tóraǵasy Qazaqstan men Qyrǵyzstannyń strategiialyq seriktestik jáne odaqtastyq qarym-qatynasyn jan-jaqty damytýǵa beiil ekenin rastady.
