Aqordanyń resmi saity Memleket basshysy Qasym-Jomart Toqaevtyń týǵan kúnine orai quttyqtaýlar kelip jatqanyn málimdedi, dep habarlaidy "Ult aqparat".
«Qazaqstan Prezidentiniń týǵan kúnine bailanysty shet memleketterdiń basshylarynan, parlament tóraǵalarynan, úkimet basshylarynan jáne sheteldik memlekettik organdardyń, halyqaralyq uiymdar men diplomatiialyq missiialardyń, kommertsiialyq mekemelerdiń jetekshilerinen, shyǵarmashylyq jáne ǵylymi ziialy qaýym ókilderinen quttyqtaýlar kelip jatyr.
Atap aitqanda, Resei Prezidenti Vladimir Pýtin, QHR Tóraǵasy Si Tszinpin, Túrkiia Prezidenti Rejep Taiip Erdoǵan, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Túrikmenstan Halyq Máslihatynyń tóraǵasy Gýrbangýly Berdimuhamedov, Koreia Respýblikasynyń Prezidenti Iýn Sok Iol, Resei Úkimetiniń tóraǵasy Mihail Mishýstin, Resei Federaldy Jinalysy Federatsiia Keńesiniń tóraǵasy Valentina Matvienko, Resei Federatsiiasy Memlekettik Dýmasynyń tóraǵasy Viacheslav Volodin, Eýraziialyq ekonomikalyq komissiia alqasynyń tóraǵasy Mihail Miasnikovich, Túrki memleketter uiymynyń Bas hatshysy Baǵdat Ámireev, TMD Atqarý komitetiniń tóraǵasy – Atqarýshy hatshysy Sergei Lebedev, TMD-ǵa múshe memleketterdiń Parlamentaralyq Assambleiasy Keńesiniń Bas hatshysy Dmitrii Kobitskii, Ujymdyq qaýipsizdik shart uiymynyń Bas hatshysy Stanislav Zas jáne basqalar quttyqtaý jedelhattaryn joldady», - dep jazdy aqparat kózi.
Sonymen qatar Qasym-Jomart Toqaevty týǵan kúnimen Ózbekstan Prezidenti Shavkat Mirziioev, Túrikmenstan Prezidenti Serdar Berdimuhamedov, Tájikstan Prezidenti Emomali Rahmon jáne Ázerbaijan Prezidenti Ilham Áliev telefon arqyly quttyqtady.
Quttyqtaýlar áli de kelip túsip jatyr.
