Foto: Pexels.com
Prezident Qasym-Jomart Toqaevtyń atyna Naýryz merekesine orai shet memleketterdiń basshylary men halyqaralyq uiym jetekshilerinen quttyqtaý jedelhattary kelip túsip jatyr, dep habarlaidy Ult.kz.
Resei Prezidenti Vladimir Pýtin Qasym-Jomart Toqaevty Naýryz meiramymen quttyqtady.
"Resei-Qazaqstan qarym-qatynastary strategiialyq seriktestik jáne odaqtastyq rýhynda tabysty damyp keledi. Dostas halyqtarymyzdyń igiligi jolynda, Eýraziia keńistigindegi qaýipsizdik pen turaqtylyqty nyǵaitý maqsatynda ózara tiimdi bailanystardy odan ári arttyrý úshin ortaq kúsh biriktiretinimizge senimdimin", – dep jazylǵan quttyqtaýda.
QHR Tóraǵasy Si Tszinpin Naýryz kóktemniń kelýi men tabiǵattyń oianǵanyn bildiretinin jazǵan. Sondai-aq bul meiram Qazaqstan halqynyń igilikke, yntymaq pen órleýge umtylysymen ushtasatynyn atap ótken.
"Ekijaqty qarym-qatynastardy damytýǵa basa mán beremin. Sizben berik dostyǵymdy maqtan tutamyn. Qytai men Qazaqstan arasyndaǵy dástúrli dostyqty nyǵaityp, eki eldiń máńgi ári jan-jaqty strategiialyq seriktestigin tereńdetý úshin kúsh-jigerimizdi biriktirýge daiynmyn", – delingen jedelhatta.
AQSh Prezidenti Donald Tramp jedelhatynda Memleket basshysy men Qazaqstan halqyn yntymaq pen jańarý merekesimen quttyqtady.
"Bizdiń memleketterimizdi uzaq jyldardan beri qalyptasqan ózara tiimdi yqpaldastyq bailanystyrady. Aldaǵy ýaqytta qaýipsizdik, ekonomika jáne basqa da salalarda jańa jetistikterge jetetinimizge senimdimin. Bizdiń jasampaz elderimiz tabysty jolǵa qadam basqan kezeńde, Amerika halqy Qazaqstannyń egemendigin, táýelsizdigin, aýmaqtyq tutastyǵyn árdaiym qoldaidy", – dep jazǵan Donald Tramp.
Túrkiia Prezidenti Rejep Taiip Erdoǵan jedelhatynda Naýryzdyń san ǵasyrlyq dástúri beibitshiliktiń, baýyrmaldyq pen kelisimniń mańyzyn eske salatynyna toqtalǵan.
"Naýryz – dúnie júzindegi beibitshilikke degen úmitti nyǵaityp, halyqaralyq dialog pen yntymaqtastyqtyń jańa deńgeige kóterilýine septigin tigizedi dep oilaimyn. Elderimiz arasyndaǵy berik dostyq pen baýyrlastyq bailanys qarqyndy damyp, ekijaqty yqpaldastyǵymyz keńeie beretinine senimdimin", – delingen quttyqtaýda.
Sonymen qatar Memleket basshysyn Ózbekstan Prezidenti Shavkat Mirziioev, Qyrǵyzstan Prezidenti Sadyr Japarov, Tájikstan Prezidenti Emomali Rahmon, Túrikmenstan Prezidenti Serdar Berdimuhamedov, Túrikmenstan Halk Maslahatynyń Tóraǵasy Gýrbangýly Berdimuhamedov, Ázerbaijan Prezidenti Ilham Áliev, Iran Prezidenti Masýd Pezeshkian, Palestina Prezidenti Mahmud Abbas, Tatarstan Raisy Rýstam Minnihanov, Túrki memleketteri uiymynyń bas hatshysy Kýbanychbek Ómiráliev jáne birqatar halyqaralyq uiymnyń jetekshileri men basqa da resmi tulǵalar quttyqtady.
Quttyqtaý jedelhattary áli de kelip túsip jatyr.
