Foto: Informburo.kz
Prezident Qasym-Jomart Toqaevtyń atyna Qurban ait merekesine orai shet memleketterdiń basshylary men halyqaralyq uiymdardyń jetekshilerinen quttyqtaý hattary kelip túsip jatyr, dep habarlaidy Ult.kz.
Ózbekstan Prezidenti Shavkat Mirziioev Memleket basshysy men Qazaqstan halqyna izgi tilegin joldaǵan.
– Sońǵy jyldary bizdiń batyl saiasi erik-jigerimizdiń arqasynda halyqtarymyz arasyndaǵy san ǵasyrlyq tyǵyz dostyq pen tatý kórshilik bailanystar múlde jańa odaqtastyq deńgeiine kóterilgenin airyqsha atap ótkim keledi, – delingen jedelhatta.
Qyrǵyzstan Prezidenti Sadyr Japarov Qurban ait adamdardyń boiyndaǵy meiirimdilik, raqymshylyq, tózimdilik pen qaiyrymdylyq sekildi asyl qasietterdi jan-jaqty tanytatyn erekshe meiram ekenin aitqan.
– Bul mereke baýyrlas halyqtarymyzǵa beibitshilik syilap, baq-bereke darytyp, qyrǵyz-qazaq strategiialyq seriktestigi men ózara tiimdi yntymaqtastyǵynyń belsendi damýyna yqpal ete beretinine senimdimin, – dep jazylǵan quttyqtaýda.
Tájikstan Prezidenti Emomali Rahmon da Qasym-Jomart Toqaevty Qurban ait merekesimen quttyqtady.
– Osy merekeniń izgilik, toleranttylyq, qaiyrymdylyq jáne ózara qoldaý siiaqty rýhani negizi aldaǵy ýaqytta da memleketterimizdiń jáne halyqtarymyzdyń arasyndaǵy dostyqty, ekijaqty tiimdi yntymaqtastyqty odan ári nyǵaitýǵa berik negiz qalaitynyna senemin, – delingen tájik kóshbasshysynyń quttyqtaýynda.
Túrikmenstan Prezidenti Serdar Berdimuhamedov Memleket basshysyna zor densaýlyq, mol baqyt, al baýyrlas qazaq halqyna qut-bereke tiledi.
Qurban ait meiramyna orai ózderiniń izgi tilekterin Ázerbaijan Prezidenti Ilham Áliev, Túrikmenstan Halk Maslahatynyń Tóraǵasy Gýrbangýly Berdimuhamedov, BAÁ Prezidenti sheih Muhammed ben Zaid Ál Nahaian, Mysyr Prezidenti Ábdel Fattah Ás-Sisi, Iordaniia Koroli II Abdalla, Kýveit Ámiri sheih Mishaal ál-Ahmad ál-Djaber as-Sabah, Oman Sultany Haisam ben Tariq, Bahrein Koroli Hamad ben Isa Ál Halifa, Palestina Prezidenti Mahmýd Abbas, Aljir Prezidenti Ábdelmájid Tebbýn, BAÁ Vitse-prezidenti, Premer-ministri, Dýbai Ámirshisi sheih Muhammed ben Rashid Ál Maktým jáne taǵy basqalar joldady.
Quttyqtaý hattary men jedelhattar áli de kelip túsip jatyr.
