Foto: Aqorda
Astanada Prezident Qasym-Jomart Toqaevtyń qatysýymen Parlamenttik reforma jónindegi jumys tobynyń otyrysy ótti, dep habarlaidy Ult.kz.
Jiynda Memlekettik keńesshi Erlan Qarin Prezidentke Jumys tobynyń atqarǵan qyzmeti týraly baiandap, Parlamentti transformatsiialaýǵa qatysty usynylyp otyrǵan konstitýtsiialyq ózgeristerdiń kólemi aýqymdy ekenine nazar aýdardy.
Memlekettik keńesshi Jumys toby músheleriniń ortaq pikirin jetkizip, bul ózgerister saiasi júieni ýaqyt talabyna sai jańǵyrtýǵa yqpal etetinin aitty.
Prezidenttiń quqyqtyq máseleler jónindegi kómekshisi Erjan Jienbaev azamattardan kelip túsken usynystar negizinde Konstitýtsiialyq reforma jónindegi jumys toby músheleri ázirlegen basty tásilder týraly baiandady.
Atap aitqanda, byltyrǵy qazan aiynan beri ótip kele jatqan otyrystarda jańa Parlamentke qatysty máselelerdiń bári qaraldy. Onyń ishinde depýtattar sany, ókilettik merzimderi, sailaý tártibi, bir palataly Parlamenttiń zań shyǵarý tetikteri, sondai-aq onyń biliktiń ózge institýttarymen ózara is-qimyl máseleleri qamtyldy.
Parlamentarizm institýtynyń direktory Natalia Pan azamattardan, sarapshylardan, qoǵamdyq birlestikterden e-Otinish jáne eGov platformalary arqyly kelip túsken usynystar týraly aqparat berdi.
Birneshe ai ishinde saiasi partiialardyń barlyǵy, ondaǵan úkimettik emes uiym, biznes-qoǵamdastyq ókilderi, quqyqtanýshy ǵalymdar men sarapshylar konstitýtsiialyq reformaǵa qatysty óz bastamalaryn joldaǵan.
Parlamenttik reformadan bólek, Jumys tobyna azamattardan memlekettik qurylymnyń jalpy máseleleri men saiasi jáne qoǵamdyq institýttardy jetildirýge qatysty 1,6 myńǵa jýyq usynys kelip tústi.
Parlament Májilisindegi «Amanat» partiiasy fraktsiiasynyń jetekshisi Elnur Beisenbaev jáne «Aq jol» partiiasynyń kóshbasshysy Azat Perýashev, «Jalpyulttyq sotsial-demokratiialyq partiia» fraktsiiasynyń basshysy Ashat Rahymjanov parlamenttik reforma aiasynda júzege asyrylatyn konstitýtsiialyq ózgeristerdiń aýqymdy ekenin málimdedi.
Olar óńirlerde Parlament depýtattarynyń jumys kezdesýleri barysynda azamattardyń aldaǵy saiasi reformaǵa airyqsha qyzyǵýshylyq tanytyp otyrǵanyn jetkizdi.
Sondai-aq jiynda Parlament Senatynyń Konstitýtsiialyq zańnama, sot júiesi jáne quqyq qorǵaý organdary komitetiniń tóraǵasy Nurlan Beknazarov, Parlament Májilisiniń depýtattary Únzila Shapaq, Marat Báshimov, Nikita Shatalov, saiasattanýshy Bórihan Nurmuhamedov pikirlerin bildirdi.
Otyrysty qorytyndylaǵan Memleket basshysy aldaǵy konstitýtsiialyq reformany talqylaý bastalǵaly beri jarty jylǵa jýyq ýaqyt ótkenin eske saldy.
Osy kezeń ishinde qoǵamda eldiń joǵary zań shyǵarýshy organyn transformatsiialaýdyń maqsattary men mindetterine qatysty durys túsinik qalyptasty.
Qasym-Jomart Toqaev qyrkúiek aiyndaǵy halyqqa arnaǵan Joldaýynan keiin órbigen qoǵamdyq pikirtalastardy muqiiat qadaǵalap otyrǵanyn jetkizdi.
Memleket basshysy talqylaý nátijesin, saraptama qorytyndylaryn, usynylǵan túzetýlerdiń jobalaryn, sondai-aq konstitýtsiialyq reformaǵa qatysty azamattardan kelip túsken usynystardy egjei-tegjeili zerdeleýde.
Saiasi júieni odan ári reformalaýdyń mańyzy men mazmunyna toqtalǵan Prezident institýtsionaldyq negizdi tereń jańǵyrtý jáne zań shyǵarýshy bilik tarmaǵyn júieli túrde qaita formattaý qajet ekenin aitty.
– Erteń Ulttyq quryltai otyrysynda men elimizdiń taǵdyryna qatysty bul másele boiynsha naqty pikirlerimdi aitamyn. Naqtylai aitqanda, elimizdiń sapalyq turǵydan múldem jańa saiasi turpaty qalyptasyp jatyr. Parlamenttik reformany júzege asyrý úshin Konstitýtsiianyń birden birneshe bólimin qaita qaraý qajet bolady. Sondyqtan Ata zańymyzǵa osyǵan deiin engizilgen ózgertýlerdi eskersek, Jumys toby usynyp otyrǵan túzetýler jobasy Qazaqstannyń shyn máninde jańa Konstitýtsiiasy týraly aitýǵa múmkindik beredi, – dedi Memleket basshysy.
