Qazaqstan Prezidenti Qasym-Jomart Toqaev Qosshy aýylyna jumys saparymen bardy, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy jumys sapary barysynda injenerlik-kóliktik infraqurylym ahýalymen tanysyp, jergilikti sý taratý stantsiiasyn aralap kórdi. Qazaqstan Prezidentine sýmen jáne elektr qýatymen qamtamasyz etý máselesin sheshý jónindegi tapsyrmanyń oryndalýy týraly baiandaldy.
Sonymen qatar, Qasym-Jomart Toqaev R.Qoshqarbaev atyndaǵy №1 orta mektepke bardy. Memleket basshysy muǵalimdermen jáne oqýshylarmen áńgimelesý barysynda sapaly bilim alý úshin elde barlyq qajetti jaǵdai jasalǵanyn aitty.
Qazaqstan Prezidenti aýyl turǵyndarynyń sany jyldam ósip kele jatqanyn, atalǵan jaǵdai azamattardyń turmys sapasyna keri áser etpeýi kerek ekenin aitty. Úshaýysymdy mektepterdiń máselesin sheshýge baǵyttalǵan sharalarǵa erekshe nazar aýdardy.
- Biz bul máseleni jaqsy bilemiz jáne Qosshy aýylynda 1200 oryndyq mektep salýdy josparlap otyrmyz. Tiisti qarajat bólindi. Atalǵan másele meniń baqylaýymda bolady, - dedi Qasym-Jomart Toqaev.
Memleket basshysy bul eldi mekenniń halqy resmi eseptelgen mejeden kóp artyp ketkenin aitty.
- Statistikalyq málimet boiynsha kent 16 myń adamǵa eseptelgen. Biraq is júzinde 50 myńnan astam halyq turady. Bul aýdannyń áleýmettik salasyna úlken salmaq túsiredi. Atalǵan máseleni oblys basshylyǵymen talqylap, júieli túrde sheshetin bolamyz, - dedi Qazaqstan Prezidenti.
Sapar qorytyndysy boiynsha Memleket basshysy Úkimet pen Aqmola oblysynyń ákimdigine kemshilikterdi qalpyna keltirýge jáne aýyldy odan ári damytýǵa qatysty naqty tapsyrmalar berdi.
