Jas shańyraq baqyt besigine ainalýy tiis. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aitty, dep habarlaidy QazAqparat.
«Jastar saiasaty týraly aitqanda otbasy institýtyn umytpaýymyz kerek. Bul – dástúrdi, ulttyq qundylyqtardy jáne urpaqtar sabaqtastyǵyn saqtaý úshin óte mańyzdy. Ókinishke orai, qazirgi tańda ajyrasý faktileri osy saladaǵy túitkildi máseleniń birine ainaldy», - dedi Qasym-Jormat Toqaev.
Memleket basshysy bul máselege áli kúnge deiin basa mán berilmei otyrǵandyǵyn basa aitty.
«Halqymyzda »Otan – otbasynan bastalady« degen qanatty sóz bar. Árbir otbasyn saqtaý – Otanymyzdyń berik bolýynyń kepili. Jas shańyraq baqyt besigine ainalýy tiis. Olardyń árqaisysyna tutastyq pen tatýlyqtyń dástúrin ornyqtyrýymyz kerek. Ziialy qaýym ókilderi men ustazdar jastar arasynda túsindirý jumystaryn júrgizip, otbasy qundylyqtaryn dáripteýi qajet. Munyń memleket úshin mańyzy óte zor. Jastardy tárbieleý isinde ata-analarǵa da zor jaýapkershilik júkteledi», - dedi QR Prezidenti.
Memleket basshysy jasóspirimderge erekshe kóńil bólýimiz kerektigin atap ótti.
«Elimizde 14 jasqa deiingi balalardyń sany sońǵy 5 jyl ishinde shamamen 1 millionǵa kóbeidi. Qazir olardyń sany 5 millionnan asty. Jasóspirimder arasyndaǵy óz-ózine qol jumsaý jáne zorlyq-zombylyqtan qorǵaý máselesi kúntártibinen túspei tur. Bizge bul baǵytta naqty sharalar qabyldaý qajet», - dedi Q.Toqaev.
