Foto: Aqorda
Qasym-Jomart Toqaev Ulttyq bitimgerlik quram sapynda tabysty qyzmet atqaryp, halyqaralyq qaýipsizdikti nyǵaitýǵa zor úles qosqan ofitserlermen jáne sarbazdarmen kezdesti, dep habarlaidy Ult.kz.
Prezident elimizge júktelgen jaýapty mindetti joǵary deńgeide atqaryp kelgen áskeriler erlik pen batyldyqtyń ozyq úlgisin kórsetkenin, sol arqyly Ulttyq armiiamyzdyń, tutas memleketimizdiń bedeli kóterilgenin atap ótti.
"Bitimger bolý – beibitshiliktiń elshisi bolý degen sóz. Bul – úlken abyroi ári zor jaýapkershilik, naǵyz erjúrek jaýyngerlerdiń qolynan keletin is. Barshańyzǵa shynaiy rizashylyǵymdy bildiremin. Qazir álemdegi jaǵdai asa kúrdeli ekenin bilesizder. Túrli qaqtyǵystar bolyp jatyr. Ókinishke qarai, onyń bárin kelissóz arqyly sheshý múmkin bolmai tur. Mundai kezde bitimgerlik missiialary airyqsha ról atqarady. Qazaqstan – beibit el. Biz álemde turaqtylyq ornatýdy kózdeitin barlyq bastamany qoldaimyz, – dedi Joǵarǵy Bas qolbasshy.
Prezidenttiń aitýynsha, elimizdiń qarýly kúshteri 2014 jyldan beri Birikken Ulttar Uiymynyń bitimgerlik qyzmetine óz úlesin qosyp keledi. 80 azamat baiqaýshy jáne shtab ofitseri retinde birneshe missiiaǵa atsalysyp, 700-ge jýyq áskeri qyzmetshi BUU-nyń arnaiy operatsiialaryna qatysqan.
Memleket basshysy olardyń ishinde Áliia men Mánshúktiń, Hiýazdyń jolyn jalǵaǵan jaýjúrek arýlar da bar ekenin atap ótti.
