Memleket basshysy Ulttyq bank tóraǵasy Daniiar Aqyshevti qabyldady

Memleket basshysy Ulttyq bank tóraǵasy Daniiar Aqyshevti qabyldady, dep habarlaidy "Ult aqparat".

Kezdesý barysynda Nursultan Nazarbaevqa Ulttyq banktiń birinshi jarty jyldyqta atqarǵan jumystarynyń qorytyndylary jóninde esep berildi.

Qazaqstan Prezidenti qazirgi ýaqytta valiýta-qarjy naryǵyndaǵy turaqtylyqty saqtaý jáne ekonomikany ári qarai damytý úshin elimizde qajetti jaǵdai jasalǵanyn atap ótti.

– Qazir bizde ulttyq valiýta men ekonomikanyń turaqtylyǵyn qamtamasyz etý úshin múmkindikter bar. Birinshi jarty jyldyqta ekonomika 4 paiyzdan astam ósti. Qubylmaly baǵamǵa kóshkenimiz durys boldy. Belgili bir deńgeide aýytqýlardyń bolatynyna úirený kerek. Bul turǵyndardyń ál-aýqatyna áser etpeidi, – dedi  Nursultan Nazarbaev.

Qazaqstan Prezidenti bank sektoryn saýyqtyrý úshin qabyldanǵan sharalar jóninde aitty.

– Memleket tarapynan bankterge aitarlyqtai kómek kórsetildi. Bank júiesin qoldaý maqsatymen úsh trillion teńge bólindi. Sonymen qatar, valiýtalyq retteý jáne Ulttyq banktiń qyzmetin jetildirý máseleleri jónindegi zańnamany qaita qaradyq. Sondyqtan, bankterdiń ekonomikaǵa, sonyń ishinde shaǵyn jáne orta biznes salasyna nesie berý jumysyn jandandyrý qajet, – dedi Nursultan Nazarbaev.

Memleket basshysy turǵyndardyń salymdaryn adal jumys istemeitin aktsionerlerdiń alaiaqtyq áreketterinen qorǵaý maqsatymen Ulttyq bank tóraǵasynyń nazaryn bank sektorynyń jumysyn retke keltirý qajettigine aýdardy.

D.Aqyshevtiń málimetine sáikes, negizgi kórsetkishter boiynsha, elimizdiń qarjy naryǵynda turaqty jaǵdai qalyptasyp otyr.

– 2018 jylǵy maýsym aiynyń qorytyndysy boiynsha infliatsiianyń jyldyq kórsetkishi 5,9 paiyzdy qurady. Bul – sońǵy úsh jyl ishindegi eń tómengi kórsetkish. Ulttyq bank infliatsiia deńgeiin 2020 jylǵa qarai 4 paiyzǵa deiin tómendetýdi kózdep otyr, – dedi Ulttyq bank tóraǵasy.

D.Aqyshev Nursultan Nazarbaevqa ulttyq valiýta baǵamynyń ózgerýine áser etetin negizgi faktorlar jóninde baiandady.

– Teńge baǵamynyń ózgerýine áser etetin negizgi faktor – Qazaqstannyń saýda-ekonomikalyq naryǵyndaǵy valiýtalyq-qarjylyq jaǵdai. Ekinshi faktor – basqa valiýtalarǵa qatysty dollardyń búkil álem boiynsha nyǵaiýy. Bul oraida, kásiporyndar men turǵyndardyń mundai qubylmaly baǵamǵa beiimdelgenin atap ótý kerek. Jalpy, elimizde sheteldik valiýtaǵa degen suranystyń tómendegeni baiqalyp otyr, – dedi Ulttyq bank tóraǵasy.

Kezdesý sońynda Memleket basshysy birqatar naqty tapsyrma berdi.