Foto: Aqorda
Prezident Qasym-Jomart Toqaevtyń tóraǵalyǵymen Úkimettiń keńeitilgen otyrysy ótti. Jiynǵa Premer-Ministr Oljas Bektenov, Úkimet músheleri, Ulttyq bank tóraǵasy, oblystar men Astana, Almaty jáne Shymkent qalalarynyń ákimderi, ortalyq memlekettik organdar men ulttyq kompaniialardyń jetekshileri qatysty. Bul týraly Aqordanyń baspasóz qyzmetine silteme jasap Ult.kz habarlaidy.
Memleket basshysy jiyn barysynda Úkimet jumysynyń basty baǵyttaryn aiqyndady. Atap aitqanda, Qasym-Jomart Toqaev ekonomikany ártaraptandyrý, infraqurylymdy damytý isin jańa deńgeige kóterý, tsifrlyq tehnologiiany jan-jaqty engizý, energetikany damytý jáne iadrolyq klaster qurý, agroónerkásip kesheniniń áleýetin arttyrý, salyq-biýdjet saiasatyn reformalaý, mańyzdy jobalardy qarjy kózderimen qamtamasyz etý, sondai-aq áleýmettik qoldaý isin rettep, densaýlyq saqtaý, bilim berý jáne ǵylym salasyn odan ári damytý jónindegi naqty mindetter men josparlarǵa toqtaldy.
Prezidenttiń pikirinshe, alǵa qoiǵan mindetterdi júzege asyrý úshin tutas memlekettik apparat tiimdi jumys isteýi kerek.
– Jańa dáýirdiń syn-qaterleri az emes. Ony eńserý úshin bizge tiisti strategiia kerek. Men reformalardyń naqty baǵyty men ony júzege asyrý joldary týraly osyǵan deiin de aittym. Úkimet el ekonomikasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek jáne eń bastysy sol sheshimderdi iske asyrýǵa tiis. Bul – joǵary bilikti ári jaýapkershilik alýǵa daiyn memlekettik qyzmetshilerdiń qolynan keletin jumys. Álemdik tájiribege qarasaq, memlekettik apparattyń tiimdiligi osyndai kúrdeli kezeńderde aiqyn kórinedi. Úkimet qanshalyqty qiyn bolsa da, jappai únemdeýge kóship, biýdjet qarjysyn tek qana asa ózekti máselelerdi sheshýge jumsaýy kerek. Kórpege qarai kósiletin ýaqyt keldi. Orynsyz shyǵyndy toqtatyp, aiaǵymyzdy tartyp basý qajet, – dedi Qasym-Jomart Toqaev.
Jiynda Premer-Ministr Oljas Bektenov elimizdiń ótken kezeńdegi áleýmettik-ekonomikalyq damýy men Úkimettiń biylǵa arnalǵan josparlary týraly baiandady. Premer-Ministrdiń orynbasary – Ulttyq ekonomika ministri Serik Jumanǵarin elimizdiń fiskaldyq júiesin, iaǵni salyq jáne biýdjet salasyn reformalaýǵa qatysty ustanymdardy tanystyrdy. Aqsha-nesie saiasatyna qatysty máseleler boiynsha Ulttyq bank tóraǵasy Timýr Súleimenov sóz sóiledi. «Samuryq-Qazyna» qorynyń basqarma tóraǵasy Nurlan Jaqypov qordyń qyzmeti týraly esep berdi.
Budan bólek, Astana qalasynyń ákimi Jeńis Qasymbek, Shymkent qalasynyń ákimi Ǵabit Syzdyqbekov jáne Qyzylorda oblysynyń ákimi Nurlybek Nálibaev baiandama jasady.
Memleket basshysy Qasym-Jomart Toqaevtyń sóilegen sóziniń tolyq mátinimen myna silteme arqyly tanysa alasyzdar.
