Memleket basshysy «Táýelsizdik urpaqtary» grantyn tapsyrý rásimine qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev jastardy el Táýelsizdiginiń 30 jyldyq mereitoiymen quttyqtap, búgingi kezdesýdiń erekshe mán-mańyzy bar ekenin aitty. Prezident Táýelsizdik urpaqtaryn, shyn máninde, jańa Qazaqstannyń basty simvoldarynyń biri retinde atap ótti.
– Elimiz derbes memleket bolǵannan beri oiy erkin, rýhy azat tutas býyn ósip jetildi. Táýelsizdik perzentteriniń aldyńǵy tolqyny erjetip, el isine aralasýda. Olar otanymyzdyń ósip-órkendeýine óz úlesin qosyp kele jatyr. Men egemendik kezeńinde týyp-ósken jastarymyzǵa arnaiy grant bólýdi tapsyrǵanmyn. Bul – talapty ul-qyzdarymyzdyń bastamalaryn qoldaý úshin jasalǵan qadam. Qazaqta «Jas kelse – iske» degen jaqsy sóz bar. Halqymyz jastarǵa árdaiym zor senim artyp, erekshe úmit kútedi. Urpaqtyń tárbieli, bilimdi jáne bilikti bolýyna airyqsha den qoiady, – dedi Memleket basshysy.
Qasym-Jomart Toqaev daryndy jastarymyz elimizdiń bolashaǵyna degen senimdi nyǵaita túsetinin, olardyń týǵan el úshin qyzmet etýge qulshynysy qýantatynyn aitty.
– Men grant jeńimpazdary usynǵan jobalarmen tanysyp shyqtym. Bul jobalardyń kópshiliginde ekologiiaǵa basa mán berilgenin baiqadym. Bul – óte durys. Óitkeni, qorshaǵan ortany qorǵaý – qazir barsha adamzat úshin asa mańyzdy másele. Keń baitaq jerimizdiń biregei tabiǵatyn saqtaý – bárimizdiń qasietti boryshymyz. Jastardyń tyń ideialary naqty júzege asyp, halyqtyń igiligine ainalady dep senemin. Shyn máninde, bul elimizdiń mereitoiyna Táýelsizdik urpaqtarynyń tartýy bolmaq, – dedi Memleket basshysy.
Prezident jastardy qoldaý memlekettik saiasattyń negizgi baǵyty ekenine toqtaldy. Qasym-Jomart Toqaev ótken ǵasyrdyń 90-shy jyldaryndaǵy daǵdarys kezinde «Bolashaq» atty aýqymdy bilim baǵdarlamasynyń júzege asyrylǵanyn jáne onyń Tuńǵysh Prezidentimiz Nursultan Ábishuly Nazarbaevtyń bastamasy ekenin atap ótti.
– Sonyń arqasynda álemniń úzdik joǵary oqý oryndarynda elimiz boiynsha myńdaǵan jas bilim aldy jáne áli de oqyp jatyr. Olardyń kóbi Qazaqstannyń qarqyndy damýyna zor úles qosyp keledi. Prezidenttik jastar kadrlyq rezervi tiimdi áleýmettik liftke ainaldy. Bul bastama jastardyń, órshil kásibi mamandardyń memlekettik basqarý júiesinde ózin taǵy bir márte dáleldeýine múmkindik beredi, – dedi Qasym-Jomart Toqaev.
Sonymen qatar partiialardyń sailaý tizimindegi 30 paiyzdyq kvota Májilis pen máslihattarda jastar qatarynyń kóbeiýine yqpal etkenin aitty. Prezident jastardy áleýmettik turǵydan qoldaityn jobalar men baǵdarlamalardyń júzege asyrylyp jatqanyna toqtaldy.
– Jastardy qoldaý úshin turǵyn-úi baǵdarlamalary jáne arnaiy jobalar júzege asyrylýda. Mádeniet, ǵylym men bilim salasynda tabysqa jetken daryndy jastarǵa memlekettik syilyq berilýde. Búgingi is-shara sizderdiń bastamalaryńyzdy jáne shyǵarmashylyq josparlaryńyzdy júzege asyrýǵa tyń serpin beretinine kámil senemin, – dedi Memleket basshysy.
Qasym-Jomart Toqaev qazirgi ýaqytta tabysty adam bilimdi, eńbekqor bolý, maqsatqa umtylý jáne belsendilik tanytý siiaqty qasietterimen ǵana erekshelenetinin atap ótti. Qasym-Jomart Toqaev grant jeńimpazdaryna jobalaryn iske asyrýǵa jaqsy múmkindik berilip otyrǵanyn aitty.
– Qazaqta «Talaptyǵa jol ber» degen naqyl sóz bar. Memleket jastardyń talabyn ushtaýǵa barynsha jaǵdai jasap kele jatyr. Atqarylyp jatqan aýqymdy jumystyń, reformalardyń igiligin sizder mindetti túrde kóresizder. Jaqynda Elbasy jastarǵa tereń maǵynaly úndeýin joldady. Óskeleń urpaq aǵa býynnyń úmitin aqtaityny sózsiz. Sol úshin árbir jas boiyna tek jaqsy qasietterdi sińirýi kerek, – dedi Prezident.
Jiyn sońynda Memleket basshysy jasampaz, otanshyl ári ultjandy jastar ǵana elimizdi órkendete alatynyn aityp, jastardyń bolashaqta kásibi maman, óz isiniń naǵyz maitalmany bolatynyna, sol arqyly aǵa býynnan asyp túsetinine senim bildirdi.
Jastar óz kezeginde memlekettiń qoldaýy úshin Prezidentke alǵys aitty.
