Foto: Akorda.kz
Qasym-Jomart Toqaevtyń Jetisý oblysyna jumys sapary óńir ortalyǵy Taldyqorǵan qalasynda jalǵasty, dep habarlaidy "Ult aqparat" Aqordanyń baspasóz qyzmetine silteme jasap.
Prezident oblys ortalyǵyndaǵy drama teatryna esimi berilgen Qazaq SSR Halyq ártisi Biken Rimovanyń biýstine gúl shoǵyn qoidy. Budan keiin Memleket basshysy teatr ǵimaratyn aralap kórdi.
Qasym-Jomart Toqaev Taldyqorǵan drama teatrynda Jetisý oblysynyń ziialy qaýym ókilderimen kezdesip, pikir almasty.
– Búgin, mine, halqymyzǵa tanymal asa kórnekti aktrisa Biken Rimova teatrynda kezdesip otyrmyz. Óte qýanyshtymyn. Shyn máninde, biz ótken zamannyń qairatkerlerine, olardyń eńbegine laiyqty, ádiletti baǵa berýimiz kerek. Bul elimizdiń bolashaǵy úshin, jas urpaqqa durys jol kórsetý úshin qajet, – dedi Prezident.
Memleket basshysy oblys ziialylaryna jastar tárbiesi men aimaqtyń keleshegi týraly oiyn aitty.
– Biz elimizdiń bolashaǵy qandai baǵytta damitynyn oilasaq, eń aldymen, jastarymyzǵa kóńil bólýimiz kerek. Elimizdiń bolashaǵy jastardyń qolynda. Qai jerge barsam da, únemi aityp júrmin. Jastarymyzdy kózi ashyq, kókiregi oiaý, adal azamat etip tárbieleýimiz qajet. Bul – el damýynyń mańyzdy bir baǵyty. Al endi oblystyń damýyna keler bolsaq, óńirdiń áleýeti zor. Damý qarqyny jaqsy, áli de túitkildi máseleler bar. Men oblystyń jaǵdaiyn jaqsy bilemin. Aldaǵy ýaqytta da nazar aýdaramyz, – dedi Qasym-Jomart Toqaev.
Kezdesýge qatysýshylar elimizdiń mádeniet salasyna erekshe kóńil bólinip, memlekettiń qoldaýyn sezinip otyrǵanyn jetkizip, Prezidentke alǵys aitty. Sonymen qatar oblys aqsaqaldary keshe Respýblika kúninde ózińiz kótergen kók bairaǵymyz jyǵylmasyn degen tilegin bildirdi.
Memleket basshysy bul, eń aldymen, turaqtylyqtyń, tynyshtyqtyń arqasy ekenine nazar aýdardy.
– Ózderińiz bilesizder, álemdegi ahýal kúrdeli. Eń qubylmaly kezde turmyz. Kúrdeli kez. Sol sebepti beibitshilik bizdiń basty bailyǵymyz ekenin jaqsy túsinýimiz kerek. Birligimiz myǵym bop, bir el bolyp eńbek etýimiz qajet. Elde zań ústemdigi men tártip bolsa ǵana, tynyshtyq pen damý bolady. Prezidentten bastap bárimiz Konstitýtsiiany qurmettep, zańǵa baǵynýymyz kerek. Zań aldynda bárimiz teńbiz, – dedi Qasym-Jomart Toqaev.
Kezdesý sońynda Prezident elimizdegi bastamalardyń tiimdi júzege asyrylýyna eleýli úles qosyp júrgen oblys belsendilerine rizashylyǵyn bildirdi.
